Регион вуйлатыше Морко районыш миен. Тушто Александр Евстифеев эрыктыме сооруженийлам, чоҥымо пашам, йоча сымыктыш школым капитально ачалымым ончен, совещанийым эртарен.
Эрыктыме сооруженийвлакым тений майыште чоҥаш тӱҥалме, пашам 1 ноябрьлан ыштен шукташ шонымо, но объектым октябрь тӱҥалтыштак сдатлат.
Тачылан пашам 80 процентлан шуктымо. Морко район администрацийым вуйлатыше Александр Голубков тиде сооружений суткаште 600 куб.м. вӱдым эрыктен кертеш манын. Моркышто гын 400 куб.м. эрыктыше куатанат сита, сандене шапаш кодеш. Марий Элым вуйлатыше лишыл жапыште районысо вич илымверыште вӱдым пуымо да йоктарен колтымо системым ачалаш тӱҥалме нерген ойлен да у скважиным ыштыме нерген йодын.
«Оксам ойырымылан тау. Районышто кум населённый пункт вӱд деч посна кодын ыле. Кызыт чыла пашам мучашлыме, подрядчик объектым сдатлаш документым ямдыла. Нине яллаште вӱд уло», – ойлен А.Голубков.
А.Евстифеев тыгак йоча сымыктыш школыш пурен, капитально ачалыме пашам аклен. Сомыл «Культура» нацпроект почеш ышталтеш. Тидлан 8,7 млн теҥгем ойырымо. Тачысе кечылан леведышым вашталтыме, тӱжвал могырым шотыш кондымо, вентиляцийым ыштыме, отделке да сантехнике паша кая. Сымыктыш школ 20 августлан ямде лийшаш.
Объектлам ончен савырныме деч вара регион вуйлатыше туштак совещанийым эртарен. Тӱҥ ой-влак:
▼ У эрыктыме сооружений графикым ончылтен чоҥалтеш, тошто сооруженийым ачалыман.
▼ Республикыштына ныл сымыктыш школым капитально олмыктенна. Сай школышто у семӱзгар-влак, чапле мебель лийшаш улыт.
▼ Корным ачалыме паша районышто сайын кая, но ятыр ситыдымаш уло. Яллаштат корным шотыш кондыман. Вашлиймаште тыгак ялозанлык, медицине, инвестиций нерген ойлымо.