Аксар Эльтемеровым марий муро аланыште шукын палена. Тудо мура, шкеак мурылан шомакым воза, семым келыштара.
А.Эльтемеров Марий Турек посёлкышто шочын, Советский район Кугу Кодам ялыште кушкын. Мурен, почеламутым возен моштымо мастарлыкше аваже Ольга Константиновна деч куснен. Ольга Эльтемерован мурсаскаже-влакым таче газетлаштат чӱчкыдын вашлийына.
Аксар сӱретлаш йӧрата. Ты мастарлык тудлан ачаже Альберт Владимирович деч куснен. Эрге ачажын пушеҥгыш пӱчкеден сӱретлымыжым изиж годсек йӧратен ончен. Рвезе спортлан шӱман кушкын. Школ деч вара Н.Крупская лӱмеш Марий пединститутын физвоспитаний факультетыштыже физкультурым туныктышо специальностьым налын.
Кызыт Эльтемеровмыт Москошто илат. Аксар тушто Россий МЧС-ын пожар ваштареш кучедалме службыжын кугыжаныш академийыштыже тырша.
Марий лӱман улмыж дене А.Эльтемеров кугешна. Лӱмжӧ нерген тудо тыгерак мане:
– Тыгай лӱмым мыланем ачам ден авам пуэныт. Марий патыр лийже манын шоненыт. Аксар — марий лӱм. Мыйын шонымаште, лӱм келшымашым кондышо, родым пойдарыше ош талешке значениян. Рушла эше «миротворец» маныт.