8 апрельыште Марий Эл Республикысе Т.Евсеев лӱмеш тоштерыште «Древняя жизнь» выставке почылтын. Экспонант-влакым Виче палеонтологий тоштерын фондшо гыч налме. Ончер 4 июль марте шуйна.
Ончерышке лукмо экспонант-влак 500 миллион ий деч ончычсо жапым авалтат. Тушто планетыште илышын негызлалтмыже, тудын вияҥ толмыжо, динозавр-влакын колымышт деч ончыч могай янлык-влакын лиймышт нерген ойлалтеш.
Выставкыште 50 утла экспонант уло. Мландыште кӱнчен лукмо тӱрлӧ янлык-влакын вуйгоҥгыраштым, лулегыштым ончыктымо. Поснак тираннозаврын да трицератопсын уэмдыме вуйгоҥгыра (1,2 метр) экспонантышт кумда верым налыт.