— 1991 ий 5 июльышто «Кугарня» газетын икымше номерже ош канде тӱсан лектын, а икымше лаштыкшым мотор ӱдырын чурийже сылнештарен. Мо оҥайже: тиде номерым пӱтынек рвезе-влак луктыныт. Тӱҥ редактор Александр Абдулов, ответственный секретарь Юрий Байгуза, редактор-влак Геннадий Гордеев, Владимир Козлов, Тимофей Петухов, Вячеслав Абукаев, Юрий Григорьев, Юрий Русанов да молат.
Варажым ӱдыр-влак кокла гыч эн ончыч Алевтина Мокеева тольо.
Тиде жапыштак редакцийлан марий йылмым палыше секретарь-машинистке кӱлын: документ пашам виктарен колташ да рвезе-влакын рукописьыштым газетлан печатлен шукташ.
Марий Эл Республикын икымше Президентше Вячеслав Максимович Зотинын приёмныйыштыже секретарьлан ыштыше Юлия Семёновна Полянина деке Александр Саликович ты йодыш дене пурен. Но тудо шке олмешыже мыйым темлен. Тунам тиде пашалан тунем лектынам веле, паша верым эше муын омыл ыле. Тыге мый «Кугарня» газет редакцийын коллективышкыже ушненам. Куанемлан мучаш лийын огыл, молан манаш гын, пиалешем, печатлыме машинке механический огыл, а электрический лийын. Лу парням модыктен печатлен шинчымем годым шкемым пианистке дене таҥастаренам.
Рвезе-влак ончыклык газетын номержым ямдылаш кажне шочмын эрдене погыненыт. Вийвалне улшо, чолга, келге шонымашан, писе уш-акылан да лӱддымӧ журналист-влак газетын могай лийшашлыкшым раш паленыт, тудо калыкын чонжым савырен кертше самырыкланат, кугурак ийготанланат келшыже манын, чот тыршеныт. Кажне планёркышто манме гай тугай ӱчашымаш каен шоген, кабинетыште кучедалыт манынат шоненыт. Шарнем, мемнан кудымшо пачашыште Москва гыч ИТАР-ТАСС сводкым приниматлыше Анна Николаевна (шкеже руш ӱдырамаш) кабинетышкем пурен, икана эсогыл йодын: «Тендан рвезе-влакда кучедалыт ала мо, пеш чот лӱшкат». Газетын у номержым тыге ямдылат манын вашештенам. Тудо вуйжым рӱзалтен, лектын ошкылын.
Мыланем эше редакцийыш пурышо кажне серышым журналеш палемдаш кӱлын: кушеч толын, кӧ деч. Подписчик-влак кузерак ешаралтмым эре эскеренна. Почто дене пеҥгыде кылым кученна. Мо эше ушеш кодын: автовокзалыш лектын, автобус дене кажне районыш манме гай газетым подписчик-влаклан колтедылынна. Чылажымат жапыштыже ыштен шукташ тыршенна.
Теве тыгай мемнан самырык чонан, полмезе кумылан, «Кугарня» газетнан ончыкылыкшылан ӱшаныше коллективна лийын.
Илыш толкыныш пуламыр толмо дене коллективна палынак вашталте. Рвезе-влак эркын вес паша верлаш куснышт, ӱдыр-влак шукырак толаш тӱҥальыч. Варажым ӱдырамаш коллективыш савырныш. 19 ий тыршыме жапыштем лу тӱҥ редактор дене пашам ышташем пӱралтын улмаш.
Чаманен каласаш логалеш, икымше состав гыч ятырынже ты илыш гыч каеныт: Юрий Байгуза, Вячеслав Абукаев-Эмгак, Тимофей Локама. Кийыме верышт пушкыдо лийже, ме нуным поро мут дене шарнен илена.
А кызытсе коллективлан тыланымашем тыгай: аклыза, пагалыза тыланда корным почын пуышо-шамычым. Чолгалыкда тенданат сита, творческий шӱлышда эре вияҥ толжо. Таза, пиалан лийза!