Самырык-влаклан эртаратлше тÿрлö мероприятийышке южо еҥ чÿчкыдын ушнаш кумылан. Шукыж годым ик айдемым тÿрлö вере ужаш лиеш. Кодшо арнян Йошкар-Оласе Самырык-влакын полатыштышт Йоча-влакым аралыме тÿнямбал кечылан пöлеклалтше кугу пайрем эртыш. Тушто мый Шернур кундемын ÿдыржö Анна Прохоровам шекланышым. Тылеч ончыч Аням «Сылнымут шыже» семинарыште ужынам ыле.
Аня П. Шернур район Нурсола ял ÿдыр. Посёлкысо 1-ше номеран школышто тунемеш. Кызыт индешымше классыш вончен. Тудо почеламутым возаш кумылан, мурым мураш шÿман ÿдыр кушкеш. Мураш акажым (Л.Фёдоровам) ончен кумылаҥын. Тидын нерген тудо тыгерак мане:
— Люда акамын мурымыжым куанен колыштынам. Тудын семынак мурен моштышаш ыле манын шоненам. Тыге шке мураш тÿҥальым, мурылан шомакым шкеак келыштарышым. Семжым мыланем уста композитор В.Осипов возен. Муро «Авием» маналтеш. Шернур тÿвыра пöрт пелен «Ласточка» вокал кружок пашам ышта. Идалык наре тушто шуаралтынам. Ялыште илымемлан кöра кружокыш кошташ нелырак, сандене кызыт тушто ом тунем. Школышто, районышто эртаралтше мурымо конкурслашкат кумылын ушнем. Школышто гын, тÿрлö пайрем концертыште мураш йодыт. Тидыжым мый уло кумылын ыштем.
Тыгак почеламутым возаш йöратем. Икымше почеламутым 4-ше классыште тунеммем годым возенам. Тудым шочмо ялемлан пöлекленам. Почеламутым возымеке Люда акамлан ончыктенам. Тудо пеш мотор манын да тöрлаш полшен. Тылеч вара ятыр почеламут-влак шочыныт. Кызыт мый самырык возгалыше Христина Александрова дене кылым кучем. Пашам-влакым тудлан колтем. Христина мый денем шкешотан пашам шуктен шога: тöрлаш, рифмым келыштараш, сай образым шочыкташ полша. Тыгай пашам шуктымыжлан тудлан кугу таум ойлем.
Аня почеламутым воза, мурым мура тыгак тÿрлö лудмаш конкурслаште шкенжым терга. Яналов, Колумб, «Живая классика» лудмаште ик гана огыл участвоватлен. Шукыж годым призовой вер дене палемдалтын. Тений «Обращение к ветеранам» конкурсышто сеҥышыш лектын, «Я читаю о ветеранах» сертификат дене палемдалтын. Сандене тудым моло талантан йоча-влак дене пырля «Йоча тÿня» пайремыш ÿжыныт.
Ончыкыжым ÿдыр юрист лияш шона. Тидлан кызыт шке гыч ямдылалтеш. Индешымше класс деч вара историй, обществознаний предметла дене ешартыш шинчымашым налаш кумыл уло манеш. Яра жапым пайдалын эртараш тырша: книгам лудеш, почеламутым воза, мурым колыштеш. Теве кеҥеж каникул жаплан посёлкышто, экологический отрядыште пашам ышташ тÿҥалеш. Очыни, кажне самырык еҥ тыгаяк лийшаш! Сандене, Анялан, эре чоҥешташ, чоҥешташ веле тыланем!