Оҥай, ожно массажым кузе ыштеныт? Кушто тунемыныт? Вашмутым мый гын ом пале, самырык-влакат тидын нерген шагал колыныт. Сандене ялысе кокам деч йодым. «Мыйжат шукыжым ом пале, но ожно марий яллаште кува-шамыч лийыныт, нуным юзо маныт ыле. Шочшо азан чарныде шортмыж годым тудын мӱшкыржым туржыныт, изи азан вуйжо тура кушшо манын тӧрлатеныт. Лектын кайыше вачым, пулвуйым верышкыже шынденыт. Нуно кидшӱм дене тыгай сусыр верлам муыныт», – умылтарыш кокам.
Кызыт массажлан медколледжыште але вузышто туныктат, тӱрлӧ курс уло. Но массажистын пашажым куштылго манаш ок лий: кечыгут йол ӱмбалне шогыман, кид ноя. Параньга район Кугу Пумарий села гыч Эвелина ден Диана АЛЕКСАНДРОВАМЫТ лач тыгай пашам ойырен налыныт.
– Ӱдыр-влак, шкендан нерген каласкалыза.
Эвелина: Мый 9-ше класс марте Кугу Пумарий кыдалаш школышто, вара Йошкар-Оласе медколледжыште медсестралан тунемынам. Пытартыш курсышто массажистлан ешартыш образованийым налынам. Колледжыште тунемме кокла гыч Йошкар-Оласе физкультурно-врачебный диспансерыште йӱдым пашам ыштенам. Шкемын массаж кабинетем почмылан ынде ныл ий эртен.
Диана: Мый йоча годсек илышемым тазалыкым аралыме профессий дене кылдаш шоненам. Эвелина мый дечем куд ийлан кугурак. Тудын семынак Кугу Пумарий школ деч вара Йошкар-Оласе медколледжыш пуренам. Тӱҥ профессийлан тунемме дене пырля «Массажист» специальностьым налынам. Вара Йошкар-Оласе физкультурно-врачебный диспансерыште да Спорт сооружений-влак управленийыште массажист-медшӱжарлан тыршенам. Але марте приёмым мӧҥгыштӧ эртаренам, а шукерте огыл самозанятый семын шкемын массаж кабинетем почынам.
– Кызыт тӱрлӧ массаж нерген увертарымаш-влакым ужаш лиеш. Те могай массажым ыштеда?
Эвелина: Мый лечебный да профилактический массажым ыштем. Утларакшым – йоча-шамычлан. Кызытсе жапыште шуко ача-ава калыпйол (плоскостопий), сколиоз дене черле икшывыштым кондат. Ньога-влаклан, шочмекышт, икымше тылзе гычак тӱҥалын ик идалык марте кеч ик гана массажым ыштыман. Кызыт шуко аза шӱйжӧ шӧрын кайыме (кривошея) дене орлана, тиде черын амалже шуко. Изи йоча йол ӱмбак ок шогал, ок ошкыл – тыгай-влаклан массажым ыштем. Ава-влакланат шкешт нерген мондыман огыл, азам ыштыме деч вара тупрӱдӧ эмгана, йоча дене шинчыме годым тӱрлӧ пашам ышташ перна. Тыгай годым массаж кӱлеш.
Диана: Массаж моткоч кӱлешан: таблетке деч посна айдемын организмжым, капкылжым эмлен кертеш, чоншижмым пеҥгыдемда, сусырым тӧрлата. Травме деч больницыште эмлалтме деч вара врач-влак массажым ышташ темлат. Мый кугыеҥ-влаклан эмлыше, косметике, коям пытарыше (антицеллюлит) да мӱй массаж-влакым ыштем. Тыгак йоча-влакымат приниматлем. Кугурак-влак дене физически ноет, вий кӱлеш, а йоча-влаклан ыштыме массаж поснак чытымашым йодеш, вет ньога-влак шортыт, нуным модыктен, воштылыктен моштыман.
Ӱдыр-влакым ковашт, Галина Поликарповна Завойских, ончен куштен. Нуно тудлан тауштен илат. Икте-весе дене каҥашен, ваш-ваш полшен, самырык еҥ-влак акак-шӱжарак веле огыл, а коллеге-влак улыт.
Наталья ТОКТАРОВА.
Фотом ешальбом гыч налме.