Пошкырт кундемыште илыше акак-шӱжарак Тимиркаевамытым службым пагалаш, порысым чын шукташ, профессий дене кугешнаш изинек туныктеныт.
Россий элгӧргӧ паша органлаште пӧръеҥ-влак веле огыл, ӱдырамаш-шамычат служитлат. Капкылыштым пӧръеҥ дене таҥастараш ок лий гынат, нуным начаррак улыт манаш йылме огешак савырне: тыршымышт да шуко палымышт, чытышышт да поро кумылышт, лӱддымылыкышт коллегыже-влак коклаште пагалымашым гына луктеш. Пример шотеш правам аралыме органла дене илышыштым кылдыше кум ака-шӱжарым кондынем.
Снежана, Лиана да Диана пашам йӧратыше тыглай ешыште шочын-кушкыныт. Ачашт, полиций подполковник Илья Тимиршинович Тимиркаев, правам аралыме органлаште 32 ий пашам ыштен, тушеч пелыже наре жапым – уголовный розыск вуйлатышылан. Ачаштым онченак, ӱдыр-влак ончыкылык профессийым ойырен налыныт. Еҥ-влаклан полшаш, нунын праваштым аралаш шоненыт.
Лӱддымӧ подполковник
Калтасасе 1-ше №-ан кыдалаш школ деч вара 2003 ийыште Снежана Ильинична Кумушбаева (Тимиркаева) Россий МВД-н Калтаса районысо пӧлкашкыже патрульно-постовой службын пашаеҥже семын толын. Вара ИВС-ыште (изолятор временного содержания), потребительский рынок аланыште правам пудыртымо ваштареш кучедалме да административный законодательствым шуктымо отделыште кугурак инспекторлан тыршен.
2011 ий августышто Пошкырт кугыжаныш университетыште юридический образованийым налмеке, тудым Калтаса район полиций пӧлкасе следственный отделыш следовательлан шогалтеныт.
2015 ийыште Снежана Ильинична пелашыж дене Брянскыш илаш кусненыт. Туштат полиций майор оласе следственный отделыште кугурак следователь лийын. Шым ий гыч Кумушбаевмыт Башкирийыш пӧртылыныт. 2022 ий гыч таче марте Снежана Ильинична Россий МВД-н Бурай районысо пӧлкаштыже следственный группын начальникшылан ышта. Ынде 13-шо ий погонан ӱдырамашын тӱҥ сомылжо – осал пашам ыштыше-влакым кычалаш. Отделыштыже тудо шкетын ӱдырамаш. Но пӧръеҥ-влак пагалат, кеч-кунам полшаш ямде улшо йолташлан шотлат. Коллеге-влакын палдарымышт почеш, тудым нормированный огыл паша кече, дежурство, командировко-влак да полиций службышто вашлиялтше моло нелылык огыт лӱдыктӧ.
Юстиций подполковник Снежана Ильинична шкеже следственный подразделенийыште тыршыше пашаеҥ чытыше, шонымашке шуаш чыла ыштыше, шке деч пеҥгыдын йодшо лийшаш манын палемда.
Службылан ятыр жапым ойырыман гынат, ӱдырамаш шке ешыжлан: Антон Витальевич пелашыже да кок икшывыштлан – пагытым муаш эреак тырша.
Полиций капитан, участковый
Лиана Ильинична ден Диана Ильинична йыгыр улыт. Школышто тунеммышт годымак нуно, ачаштым да акаштым ончен, шке илышыштым правам аралыме орган дене кылдаш шоненыт.
Школышто тунеммышт годымак Пошкырт экономико-юридический техникумыш тунемаш пуреныт, «Юриспруденция» специальностьым ойырен налыныт. Школым ӱдыр-влак ший медаль дене тунем пытареныт да Пошкырт кугыжаныш университетын студентышт лийыныт. Дипломым налмекышт, йыгыр-влак тӱрлӧ корным ойыреныт.
Лиана Ильинична Гараева (Тимиркаева) 2013 ий августышто Россий МВД-н Калтаса районысо ОГИБДД-ш корно лӱдыкшыдымылык пропаганде шотышто инспекторлан толын. Варажым ГИБДД-н административный практикыштыже служитлен, Россий МВД-н Калтаса районысо дознаний отделыште дознавательлан тыршен, административный законодательствын инспекторжо лийын. Кызыт полиций капитан участковый уполномоченныйлан ышта.
Лиана Ильинична « Башкортостанын полиций миссше-2015» конкурсышто ончыл верыш лекше вич еҥ коклаште лийын. Тудын Руслан Фанисович пелашыже – Россий МВД-н Нефтекамск оласе отделыште ОГИБДД-н ДПС инспекторжо, полиций лейтенант. Ӱдырышт уло.
Судьян полышкалышыже
Диана Ильинична Шакирова (Тимиркаева) шке илышыжым судебный системе дене кылден.
Тудо ачажын да акаже-влакын корныштым молан ойырен налын огыл манын йодмылан тыгерак вашештен:
– Ача-авана кумыньнам изинек чыным йӧраташ, икте-весылан полшаш, икте-весым аралаш туныктеныт. Садланак, очыни, пӱрымаш мыйым образований отделыш конден, тушко юрисконсультант семын пашаш толынам. Паша дене судебный заседанийлаште лияш чӱчкыдын логалын. Судыш мийыме ик кечем пӱрымашем вашталтен: искым пуымо олмеш мыланем Калтаса районысо судышто икымше разрядан специалист должностьышто пашам жаплан темленыт. Мый умыленам: тиде – у профессийлан тунемаш да шинчымашым практикыште терген ончаш сай йӧн. Самырык лийынам гынат, коллектив мыйым порын вашлийын.
2014 ийыште кӱшыл юридический образованийым налмеке, мыйым судын секретарьже должностьыш кусареныт, кумшо классан юрист чиным пуэныт. 2016 ийыште вашталтыш лийын: Пошкырт Республикын Краснокамский межрайонный судшо ышталтын, Калтаса районысо суд тушко судебный присутствий семын пурталтын. Мыйым судьян полышкалышыжлан шогалтеныт, 3-шо классан юстиций советник чинан улам. Пашам оҥай, но тунамак моткоч ответственный. Судебный процесслан ямдылалтме годым судьялан полшем, судебный пунчал проект-влакым ямдылем да эше моло сомылымат шуктем. Нормативно-правовой акт-влак эре вашталтыт, садлан судьян полышкалышыжлан шинчымашым эре келгемдыман.
Диана Ильиничнан пелашыже Евгений Витальевич – Россий МВД-н Калтаса районысо отделыштыже участковый уполномоченный, полиций лейтенант. Нунын кок эргышт кушкеш.
Яра жапышт годым ака-шӱжар ешышт дене шочмо суртышкышт толын каят. Тушто нуным эре вучат. Илен-толын, ончыкыжым ака-шӱжар-влакын икшывыштат авашт але кочашт семынак МВД-ште службым ойырен налыт гын, нуно йывыртат веле. Тӱҥжӧ – шке пашаштым куанен ыштышт, палемдат погонан ӱдырамаш-влак.
Елена Акиева.
Еш альбом гыч налме фото-влак.