Премьер деч вара шонкалымаш
Кодшо кечылаште М.Шкетан лӱмеш Марий драмтеатрыште премьер лие: калык ончыко «Кавасе алаша» комедийым луктыч.
Вик каласем, спектакль келшыш. Чыла шотыштат: постановкат, сценографият (нимо уто уке), костюмат, актёр-влакын модмыштат, куштымаш-шамыч да марла йоҥгышо муро-влак (нуным да спектакльым марлашке Марий Элын калык поэтше Геннадий Сабанцев-Ояр кусарен). Композитор Василий Соловьёв-Седойын семже-влак чоным тарватат да постановкын содержанийжым келгын почын пуат. Режиссёр Роман Алексеев тачысе кечылан келшыше, жапын йодмо спектакльым ойырен налын моштен. Сар нерген, но поро шӱлышан произведенийым.
Спектакль Кугу Отечественный сарыште сеҥымылан 80 ий теммылан пӧлеклалтын, тӱҥ герой-шамыч – сарыште кучедалше лётчик-влак. Но тыгодымак постановкышто ны кугу кредалмаш, ны пуштедымаш, ны фашист-влакын калыкым индырымышт… уке улыт. Тидым ончыктымо огыл. Тачысе саманыште, СВО кайыме жапыште, уто торжалыкым сцене гоч ончымо огеш шу. Тыгакат кажне кечын чыла тидым интернетыште, телевизорышто ужаш логалеш.
«Кавасе алаша» постановко гоч раш коеш: айдеме сарлан шочын огыл, тудо шочын илаш, йӧраташ! Но тыгодымак Шочмо элымат аралыман. Ме огыл гын, кӧ? Ты постановкыштат самырык рвезе, ӱдыр-влак тыгай пуламыр жапыш логалыныт: элым аралыман. А нуно але тидым иканаште умыленжат огыт шукто: шке семынышт пуйто ӱдырамаш ушемым ыштат да пӧръеҥ-влак могырыш ынештат ончал. Рвезе-влакат сар пытымеш ӱдырым ынешт нал. Но илыш кая, кеч-кӧнат, самырык еҥын поснак, йӧратымыже, ешым чумырымыжо шуэш. Иктат вет пален огыл, сар мыняр жап шуйна. Чылан тушманым писын сеҥена манын шоненыт. А кӱлын ныл ий шке эрык верч шогаш.
Спектакль музыкальный комедий семын ончыкталтеш гынат, садак шинчавӱд лектеш. Вет умылет: ты ӱдыр-рвезе-влакын пӱрымашышт – тиде мемнан кова-кочанан, кугезе кова-кочанан пӱрымашышт. Спектакльыште иктат илыш гыч ок кай гынат, палена: садак нине самырык ӱдыр-рвезе-влак кокла гыч шукынжо Сеҥымаш кече марте илен шуын огытыл. Вет тиде кугу да неле сар лийын.
Ты постановкым ончымо годым, шоныде, тачысе саман вуйышто пӧрдеш. Тачат мемнан лишылна-влак СВО-што тыгак элнам аралат. Нунат спектакльысе герой-влак семынак илынешт, йӧратынешт, илышын кажне татшылан куанынешт. Вет шукынжо эше самырык улыт. Тыгакак пуламыр пытымым вучат, да меат вучена. Улыт тӱҥ герой Булочкин гай лӱддымӧ герой-влакат.
Садлан, шонем, «Кавасе алаша» – тачысе жаплан келшыше спектакль: шке элын тыныслыкше верч кучедалмаш, йӧратымаш, Шочмо эл верч чон йӱлымаш нерген. Ме шочынна чылан илаш да йӧраташ. Тек сар шагалрак лиеш тӱняште. Але ынже лий нигунам!!! Тыгай шонымашым лукто ты спектакль.
Вес гана тудо 23 февральыште лиеш. Ешге ончаш миен толза.
Фото-влакым театрын альбомжо гыч налме.