Сеҥымашлан – 80 ий
2010 ийыште Сеҥымашлан 65 ий темме лӱмеш Астрахань областьысе Ахтубинск олаште шкешотан памятникым почмо. Тудо «Ме сеҥенна! Баскунчак гыч Берлин марте» маналтеш.
Авторжо-влак – скульптор-шамыч В. Жуков, В. Маринин да П.Солодков.
Памятникыште пулвуйышто автомат дене шогышо салтакым да пеленже кок верблюдым ужына. Саде янлык-влак, Мишка ден Машка, легендарный Сталинград кредалмаште участвоватленыт. Нуно Ӱлыл Юл гыч Берлин марте каеныт.