Тиде марий муро ялысе клублаште да интернетыште пытартыш жапыште поснак палыме. Тудым Максим Андреев мура. Шукерте огыл марий эстрадыште палыме мурызо Эльфис Гараев дене тиде мурым уэмден луктыныт.
– «Воктенем» муро чапланымеке, Эльфислан мурым пырля мураш темленам. Тыге мурын у версийже лектын. Тудым ме видео дене луктынна, – ойлыш рвезе.
Максим Пошкырт кундем Мишкан район Йылыш ялеш шочын-кушкын. Кызыт Йошкар-Олаште И.С.Палантай лӱмеш тӱвыра да сымыктыш колледжын хоровой пӧлкажын икымше курсыштыжо тунемеш. Кодшо ийын октябрьыште мурым рушла возен, вара руш йылме дене экзамен деч ончыч марий мурым луктын, интернетыш вераҥден. Чылаже Максимын шым мурыжо уло.
«Воктенем» муро вашке еҥ коклаште шарлен. Тудлан мутым Максим ден Наталия Алексеева возеныт, а семжым рвезе шке келыштарен. Уэмдыме мурылан аранжировкым Эльфис Гараев ыштен.
– Мурым возаш тыйым мо але кӧ кумылаҥда?
– Йӧратымаш кумылаҥда. Шуко мурыжо келшыме ӱдыремлан пӧлеклалтын. Мутым кагазыш але телефоныш возем, да чонемлан куштылго лиеш.
– Концерт дене чӱчкыдын лектын коштат?
– Шукерте огыл Ижевскыште, Бирскыште, Уфаште да Нефтекамскыште концерт дене лийынна.
– Тунемме виктышет йӧршын вес сынан. Эстраде мурылан чаракым ок ыште?
– Тиде мыланем чарак огыл. Тӱҥжӧ – пашам ышташ кумылем уло.
Декабрьыште Станислав Устюгов ден Максим Андреев марий муро альбомым лукташ ямдылалтыт. 2022 ий тӱҥалтыште ты пашалан пижыныт. Тушко вич мурым пуртеныт. Кызыт альбомлан лӱмым шонат. Максимын мутшо почеш, тыгай паша марий мурым калык коклаш шараш полша. Вес гана руш муро альбомым лукнешт. Кызытеш кум руш мурышт уло.
М.Андреевын альбомжо гыч налме фото