Тудо нерве пуштыланыме да шӱм чер годым пӱртӱс эликсирлан шотлалтеш. Тыгак давленийым нормыш конда, аритмийым эмла, шӱм, вуй корштымым чара. Кужун черланен кийыме деч вара вийым погаш полша.
Термосыш ик кугу совла шуанвондо саскам да ик кугу совла агытанора саскам пыштыза, 250 мл шокшо вӱдым темыза, 3-12 шагат шинчыктыза. Ты чай лыпландара, тыгак кылмен черланыме тургымышто пайдале.
Ик кугу совла висвис пеледыш да 1,5 кугу совла агытанора лышташ ӱмбак 500 мл шокшо вӱдым темыман да пел шагат шинчыктыман. Мален кертдыме да нерве пуштыланыме годым йӱман.
Агытанора пеледышым, саскажым, шемшоптыр лышташым, емыжшым, снегым ик изи совла дене налман да 1,5 литр шокшо вӱдыш пыштыман. Ты лемым кечеш кум гана гипертонический чер, вуй пӧрдмӧ да кардионевроз годым йӱман.
10 г агытанора лышташ, 1 изи совла шем чай, 10 г пӱртньык ӱмбак 500 мл шокшо вӱдым темыман да шинчыктыман. Ик кугу совла мӱйым ик кугу совла эҥыж дене варыман да шудо чайыш ешарыман. Чай лыпландара да кылмен черланыме деч арала.
Чай пайдале, но утыждене шуко йӱман огыл, укшинчыктен кертеш. Мӱшкыран да чызым пукшышо ӱдырамаш, тыгак изи давлениян еҥ-влаклан йӱаш огыт темле.