Морко район Унчо селаште ятыр самырык еш ила. Шукынжо верысе «Передовик» озанлыкыште тыршат.
Теве тыште агрономлан, семеноводлан пашам ыштыше Василий Ефремов ынде визымше ий озанлык пашаште «пӧрдеш». Ешыж дене Ямбатыр ялыште ила.
Дипломым налмеке, вигак ялыш
Тудо изиж годсек пален: кушкын шумекыже, агроном лиеш. Садлан школ деч вара рвезе профессионал шинчымашым налаш Марий кугыжаныш университетыш каен.
– Мыйын ачам ончыч ты колхозыштак тыршен. Тудо тракторист лийын. Ачам дене пырля чӱчкыдын шинчын коштынам. Пасушто лияш утларак келшен. Озанлыкыште тыршыше кажне гаяк специалистым паленам. Тунам агрономлан Анатолий Платонович ыштен, тудын шуктымо пашажым эреак шымленам, тыгак агроном лияш кумылаҥынам.
Школым тунем пытарымеке, моло профессий нерген шоненат омыл, документым вигак Марий кугыжаныш университетыш сдатленам. Экзаменым сайын кученам, шагал огыл баллым погенам. Садлан мыланем вес факультетыш тунемаш пураш темленыт. Но мый вет изинек агроном лияш шоненам, садлан шке шонымашем деч кораҥын омыл.
Кызыт шуко самырык еҥ, шочмо ялым коден, ӧрдыж кундемыш, кугурак олаш лектын кая. Тидыже чоныш шӱлыкым пурта. Мый университет деч вара ялыш пӧртылам манын паленам. Вет ала-кӧжӧ тыштак кодшаш, кугезына-влакын пашаштым умбакыже шуйышаш, ялым, озанлыкым нӧлтышаш, – палдарыш самырык специалист.
Василий тунеммыж годым практикым эреак «Передовик» озанлыкыште эртен. Кок гана олаште коденыт ыле гынат, кеҥеж жаплан садак тушто тыршен. Тидыже тудлан профессионал семын вияҥашыже полшен. 2021 ий гыч Ефремов ты озанлыкыште официально ышта. Йоча годсек тыршымыжым шотыш налаш гын, рвезе 12 ий чоло «Передовикым» нӧлта.
– Мыланем озанлыкыште моткоч келша. Пелашем деч «кумылет, чонет дене эре пашаште улат» манмым чӱчкыдын колам. Но мый тидлан нимынярат ом сыре. Вет мый шке верыште улам, чонемлан лишыл пашам шуктем.
Анастасият – агроном. Ме школ годсек келшенна, университетыштат пырля тунемынна. Тудо ик курслан изирак лийын. Магистратурым, аспирантурым пырля пытаренна.
Пелашем – Йошкар-Олаште шочын-кушшо ӱдыр. Но мый тудым ялыш илаш толаш кумылаҥденам. Тӱҥ шотышто Анастасия мӧҥгыштӧ тошкыштеш. Мемнан гектар наре мландына уло. Тушто тӱрлӧ пакчасаскам, шудым куштена. Тыгак ятыр вольыкым ашнена. Помидорым кушташыже йӧнан лийже манын, кугу теплицым ыштенам. Тылеч посна ковыштам, ушменым да молымат шындена, – мутланымашым шуйыш Василий.
Кеҥежым сайын тыршет гын, телым канет
В.Ефремов кеҥежым канаш, яра шинчаш жап уке, манеш. Тудын ойлымыж почеш тидым телымат ышташ лиеш. «Самырык-влаклан ялыште илаш кузерак?» йодым тудын деч, вашмут тыгерак йоҥгыш:
– Ялыште илымашын удажым омат пале ала мо. Мый эре нӧлтшӧ кумылан улам. Йолташ-шамыч чӱчкыдын тидын шотышто каныш деч посна пашам ыштет манын шылталат. Но вет тидыже паша тургымышто веле тыге лиеда. Адакшым пашам чын организоватлен моштет гын, канашат жап уло. Шуйныл кошташ, жапыштыже от ыште гын, конешне, ик арняш сомылым кок арнялан шуйдарет. Теве кормам ончыч кок арня дене ямдыленыт гын, кызыт тудым икмыняр кечыште ышташ лиеш. Тидлан техникат кызыт сайын полша.
Ефремовмытын гай еш-влак яллан ямым пуртат. Самырык-шамычын тӱрлӧ сомылым шуктымыштат кугешнаш тарата. Тугеже тыгай еш-шамычлан кӧра ял илаш, вияҥаш тӱҥалеш. Тек тыге лиеш!
И.Речкинын фотожо-влак.