ОҤАЙ ЛӰМ 
Агата Морозова Йошкар-Олаште ила. Национальный сымыктыш школыш 3-шо классыш коштеш.
Скрипке ден фортепьяным шокташ тунемеш. Тыгай оҥай лӱмым Антон ачаже пуэн. Лӱмым пуымо шотышто оҥай историй уло. Тудын нерген Агатан кочаже Севериан Александрович Морозов каласкала:
– Писатель Анатолий Ивановын «Вечный зов» романже негызеш 1973-1978 ийлаште кинорежиссёр-влак Владимир Краснопольский ден Валерий Усков шуко сериян кок кинофильмым сниматленыт. Тӱҥ герой-влак Савельевмыт еш гыч улыт. Мылам кум изак-шоляк гыч койыш-шоктышыжо, илыш умылымашыж дене Антон кугурак изашт келшен. Эргымлан (Агатан ачажлан) лачак тыгай лӱмым пуэнам.
Антон эргым, кугурак лиймекше, шкежат «Вечный зов» кином йӧратен ончен. Ӱдырамаш образвлак кокла гыч чонжылан Агата Савельева келшен. Тудо проста койышшоктышан, кӧргӧ виян, талешке ӱдырамаш. Тыге эргым ӱдыржылан Агата лӱмым пуэн.
Агатан Роман изаже, Степан шольыжо улыт. Ӱдырым чылан йӧратат. А ачаже чинче падырашыжым поснак чот арала.
Агата – тошто грек лӱм. Тудо сай, поро манмым ончыкта.
Еш альбом гыч налме фото.