Юл кундем федеральный округысо йоча да самырык сымыктыш (театр) коллектив-влакын «Театральное Приволжье» фестивальлан афишым ямдылыме конкурсыш йодмашым 15 февраль марте колташ лиеш.
Конкурсын шонымашыже – самырык-влакым театрлан шӱмаҥдаш. Тиде конкурсышто самырык уста дизайнер да сӱретче-влак шке творческий вий-куатыштым кумдан почын пуэн кертыт.
Конкурсыш Юл кундем федерал округышто илыше 6-30 ийготан еҥ-влак ушнен кертыт.
Афишын але баннерын тӱҥ темыже «Театральное Приволжье» фестиваль лийшаш. Автор шке пашаштыже фестивальын идейжым, финалистше-влак, конкурсыш пурышо спектакль-влак нерген почын пуэн кертеш.
Пашам тӱрлӧ технике дене ышташ лиеш: сӱрет, графике, батик, компьютерный дизайн, фотоколлаж да молат.
Эн сай пашам эксперт-влак ойырен налыт. Жюри коклаште Россий сӱретче ушемын, Россий сӱрет академийын еҥышт, Юл кундем федеральный округын тӱҥ сӱретчыже-влак лийыт.
Плакат да баннер-влакым theatres.fest@mail.ru адресыш «Конкурс афиш» палемдымаш дене колтыман.