Пагалыме йолташ-влак!
Марий Эллан 100 ий темме да у аэровокзальный комплексым чоҥымо лӱмеш Йошкар-Оласе аэропортлан лӱмым пуымо шотышто каҥашымашке ушныза.
Темлымаш-влакым 21 январь гыч 21 февраль марте тыгай адресла дене колташ лиеш:
- Марий Эл Республикысе Правительствын группышкыжо – (https://vk.com/govrme)
- Марий Эл Республикысе Общественный палатын группышкыжо –(oprme@yandex.ru)
3. Марий Эл Республикысе транспорт да корно озанлык министерствыш — (mintrans@gov.mari.ru) але «ВКонтакте» соцкылысе страницышке (https://vk.com/public173652650).
Евгений Кузьмин, Марий Эл Кугыжаныш Погын председательын алмаштышыже, В.М.Васильев лӱмеш МарНИИЯЛИ-н директоржо:
– Марий Элыште Российын Геройжо лӱм дене вич еҥым палемденыт. Тиде – Владимир Николаевич Матвеев, Марк Николаевич Евтюхин, Валерий Вячеславович Иванов, Владимир Ильич Шарпатов да Радик Абрарович Бариев. Пытартыш кок еҥже лётчик улыт. Мый шонем, Шарпатовын лӱмжым пуат гын, сай ыле. Шарпатовым геройло поступкыж дене кугешнем. Тудо, Афганистаныште пленыш логалмеке, ушан да чолга улмыжым ончыктен, Кандагар олаште шке йолташыже-влакым плен гыч самолёт дене утарен кертын.
Иван Ямбердов, Российын сулло сӱретчыже:
– Аэропортышто самолёт-влак чоҥештылыт, а мый нуным ош йӱксӧ манам. Тек аэропортын лӱмжӧ лиеш – Чоткар. Айдеме шочеш да чот гына магыралта, кычкыра. Чавайн, Эшпай, Кырла да молат ты илышыште марий верч чот кычкыреныт. А «Марий калык, кынелза!» манын кычкырена гын, Чоткар кынелеш да арала. Тиде философий шонымашем йоҥылыш ынышт умыло – тек Чоткар патырын йӱкшӧ тӱня мучко шергылтеш.
Альбертина Иванова, поэтессе:
– Мый аэропортлан тӱнямбал чап лӱмым налше гимнастке Зинаида Дружининан лӱмжым пуаш темлем. Олимпийский чемпионке Йошкар-Олаште шочын. 1968 ийыште икымше гана выступатлен да ныл медальым сеҥен налын, тышеч иктыже командный первенствыште шӧртньӧ медаль лийын. З.Дружинина – кодшо курымысо 60-шо ийлаште спортивный гимнастикын ик эн волгыдо шӱдыржӧ. Мехикошто эртаралтше Олимпиадыште шӧртньым сеҥен налын, тӱнямбал чемпионатлаште куд медальым сулен. СССР спортын сулло мастержым Правительствын эн кӱкшӧ наградыж – «Знак Почёта» орден – дене палемдыме.