У Торъял район Нурӱмбал ял гыч Эльвира Соколован тукымыштыжо туныктышо профессийыште тыршыше-влак ятырын улыт. Тидак ӱдырлан школ деч вара Оршанкысе шуко профилян колледжыш тунемаш каяш шӱкалтышым ыштен. Тений Эльвира дипломым налын да колледжыштак пашам ышташ кодын.
– Школышто тунеммем годым ончыкылык профессий нерген пешыже шонкален омыл. Кугезе ковам, кок кокам, ачам илышыштым туныктымо паша дене кылденыт. Тыге мыят 10-шо классыште тунеммем годым ты профессийыште пашам ышташ шонен пыштенам, да Оршанкысе колледжын студентше лийынам. Шке жапыштыже ачамат ты тунемме тӧнежыште (тунам училище маналтын) физкультурым туныктышылан тунем лектын. Специальностем – тӱҥалтыш класслам туныктышо, – каласкала Э.Соколова.
Тыште ӱдыр ик эн сай студент-влак коклаште шотлалтын. «Колледжын эн сай студентше-влак» стендыште тудынат фотожым ужаш лиеш. Ӱдырын палемдымыж почеш, чылажымат жапыштыже ыштет, тыршен тунемат гын, студент пагыт сай шарнымашым гына кода. А колледжыште пашам ыштыше преподаватель-влак эре полшат, умылтарат. Нунын дек кеч-могай йодыш дене миет гынат, полшаш ик ганат тореш огыт лий.
– Диплом деч ончычсо практикым шке тунемме Тошто Торъял школышто эртенам. Тунамак мыланем колледж гыч йыҥгыртеныт да паша верым темленыт. Мый келшенам. Кеҥежымат колледжыштак приёмный комиссийын еҥже семын пашам ыштенам. А сентябрь гыч у должностьышто пашам ышташ тӱҥалынам – директорын воспитаний да йоча мер организаций-влак дене кылым кучымо шотышто советникше улам. Тыгак студент-влаклан «Естествознание с методикой преподавания» (историй разделым) предметым наҥгаем. Должность у, йодыш шуко, документаций дене шинчылтман, – манеш Э.Соколова.
Но Эльвира Николаевналан пашаже келша, колледжыште южгунам пел сутка наре шинчылтеш. Оршанкыштак пачерым айлен ила. Вуйым кандараш, тӱрлӧ оккӱл шонымаш деч утлаш кидпаша полша. Пытартыш жапыште тудо алмазный вышивкылан шӱмаҥын, шукыж годым портрет-шамычым келыштара. Тыгак лудаш йӧрата.
Тыматле койыш-шоктышан, поро, молылан полшышо ӱдыр шкенжым эре шуараш тырша. Шукерте огыл Москош Просвещений кугыжаныш университетыште лийын, тушто квалификацийым нӧлтымӧ курсым эртен. Пашаште у кӱкшытыш шуаш Э.Соколован кумылжат, ӱнаржат ситышын. А лишыл еҥже-влак тудлан поро мут дене эре полшат, ӱшанле эҥертыш улыт.
Э.Соколован альбомжо гыч налме фото.