Шукерте огыл Интернетыште Михаил Веселовын мурымо «Ончал шинчашкем» мурыжым палыдыме ӱдыр мураш тӱҥалын. Вара тудын «Шӱшпык» мурыжо лектын. Тиде мурызо – Анастасия Питаева.
– Настя, кунам мураш тӱҥалынат?
– Пошкырт кундем Нуриман район Тошто Педий ялыште шочын-кушкынам. Изи годсек мураш йӧратем. Тидым мыланем авам ойлен. Авам бухгалтер образованиян, но кызыт вес вере пашам ышта. Ачам концертлаште мурен, ныжыл йӱкшӧ мыйынат чонем тарватен. Мый тудым шулен колыштынам. А кызыт палем: мый тудым шарнен мурем. Ачам кок ий ончыч илыш дене чеверласен.
– Кушто тунемат?
–Уфа олаште Мифтахетдин Акмулла лӱмеш Пошкырт кугыжаныш педагогике университетыште «Музыкальное образование» направлений дене тунемам.
– Тый ондакат муренам манын каласышыч, но шукынжо мурыметым пален огытыл. Кузе тиде лийын?
– Чын. Ондак мый конкурс ден мероприятийлаште веле муренам. Тений январьыште Михаил Веселовын «Ончал шинчашкем» мурыжлан, каверым видеошко войзен, Интернетыш луктынам. Тиде мурылан ремейкым лукташ йодмаш шуко пурен. Тунам нелылыкым шижым. Кузе да кӧ тидым ышта манын, шонаш тӱҥалынам. Тунам мыланем Павел Степанов полшен. Тудо Озаҥ оласе А.Н.Туполев лӱмеш национальный исследовательский технический университетыште магистратурышто тунемеш. Паша Волжский район Карай ял гыч. Тудын йӱкшӧ сылне, гитаре дене шокта. Музыкальный образованийже уке гынат, аранжировко-влакым возымыжо мыланем келша.
– Шке мурет уло мо? Концертлаште але дискотекылаште мураш йодыт?
– Кызытсе жаплан кок мурем уло: «Шӱшпык» да «Шошо». Умбакыжат муро-влак возалтыт манын ӱшанем. Ойлышым: тӱрлӧ мероприятийыште мураш йодыт. Пытартыш жапыште дискотекылашке ӱжыт.
– Марий мурызо-влак кокла гыч кӧн мурымыжо келша?
– Станислав Шакировын мурымыжым йӧратем.
Пытартыш жапыште у мурызо-влакым чӱчкыдын колаш логалеш, но Настян йӱкшӧ поснак ойыртемалтше. Ӱшанена, ме тудын лӱмжым эше кугу сцене гыч колына.