Ачаж гае тале сварщик

Шернур район Горняк посёлкышто шочын-кушшо Никита Алексеев ачажын кӱртньым левыктен ушымыжым кажне гана куанен ончен, сварке пашалан кумылаҥын. Кызыт 26 ияш пӧръеҥ Йошкар-Оласе кӱртньӧ омсам ыштыме ик заводышто кумшо ий сварщиклан тырша.

Мангалым ыштен ончен

Никита Шернур посёлкысо 1-ше №-ан, варажым 2-шо №-ан школлаште тунемын. Спортым йӧратен. Куржталыштын, футболла талын модын. Тыгодым пашаче кушкын.

Ачаже Памашъял кӱ карьерыште слесарьлан, сварщиклан ыштен, аваже Шернур посёлкысо ПМК-ште – каменщиклан. Нунын пашазе профессиян улмышт кугу пример лийын. Поснак ачажын сварке дене пашам ыштымыже сымыстарен да шке тидлан тунемаш кумылаҥын. Кугурак класслаште икымше гана шке кидше дене мангалым ыштен.

– Сварщик корочкем лийын огыл гынат, мангалым ыштен сеҥенам. Школым тунем пытарымеке, эше утларак тидлан жапым ойыраш тӱҥальым. Кузе сайын ышташ лиеш манын, тӱрлӧ йӧным кычалынам. Йолташ-влаклан пӧлекленам.

Мый такшым ачамын корныжым тошкем. Тудо опытан кидмастар: пӧрт воктенысе палисадникым сӧралын ыштен.

Сварке паша эре лишыл чучын. Варитлыме годым кочыртатыме йӱк сымыстарен, кӱртньын шулымыжым ончаш келшен. Кушкын шуын, сварщик лияшак шоненам, – мане Н.Алексеев.

Умбакыже 27 июньышто лекше номерыште лудса.