18 июньышто тӱнямбалне Ачан кечыже палемдалтеш. Ешыште ачан рольжо кугу. Тудат шке икшывыжлан жапшым ойыра, йӧратымашыжым пӧлекла, шукыж годым тӱрлӧ пашалан туныкта.
Икмыняр еҥ деч ачашт нерген каласкалаш йодна.
Алина Егошина, Марий Элын сулло артисткыже:
– Ачам ден авам Шернур район Шӱдымарий ялыште шочыныт, ик классыштак тунемыныт. Кызытат туштак илат.Кок ӱдырым да эргым ончен куштеныт, шым уныкашт куандарат.
Ачам Николай Николаевич «Восход» колхозышто эре технике дене пашам ыштен, комбайнерын полышкалышыже лийын, «Беларусь» трактор, ГАЗ-53 машина, техпомощь, автобус дене кудалыштын. Сулен налме каныш деч ончыч школышто автобус дене йоча-влакым шупшыктыш.
Изина годым ачана эре йомакым ойла ыле, кызытат уныкаже-влак тудым моткоч колышташ йӧратат. Йоча кумылым налын пеш мошта, кугурак влакым пашалан туныкта, пеленже кол кучаш налеш. Ме ачана-кочанам пеш чот йӧратена, пагалена да пеҥгыде тазалыкым, кужу ӱмырым тыланена.
