18 июньышто тӱнямбалне Ачан кечыже палемдалтеш. Ешыште ачан рольжо кугу. Тудат шке икшывыжлан жапшым ойыра, йӧратымашыжым пӧлекла, шукыж годым тӱрлӧ пашалан туныкта.
Татьяна Искибаева, почто пашаеҥ:
– Ачана Семён Александрович Аписаров Свердловск область Арти район Пакшал ялеш шочын да кызытат тыштак ила. 77 ийыш тошкалын. Ме шкенан ачана дене кугешнена. Тудо мудреч, ушан, виян, шӱм-чоным куандарен моштышо да поро. Шкежат весела, мыскарам ойлен колтымыж дене кумылым нӧлталеш. Ты ялыштак илем, сандене чӱчкыдын туддеке пурен лектам, да ме пырля сурт сомылкам ыштена.
Тудын вич ӱдыржӧ, латвич уныкаже да кок кугезе уныкаже улыт. Пырля погынена гын, ача-кочана гармоньым шокта, ме мурена да куштена. Кугу улам гынат, икмыняр йодыш деке ачам деке йодын мием. Палем: туддеч посна да тудын семын йодышем иктат решатлен ок керт. Кумылаҥден мошта. Ойлен колтымыж денак вий-куатым ешара. Ачам чыным йӧрата, тидлан туддене кугешнем.
