Марий Элым Вуйлатыше Юрий Зайцев видеоконференций йӧн дене вӱдшор да пожар лӱдыкшӧ ваштареш ыштышаш паша нерген каҥашыме совещанийышке ушнен. Тудым Россий Правительстве Председательын алмаштышыже Дмитрий Патрушев вӱден.
Вице-премьер гидротехнический объект-влакым ачалымылан да чоҥымылан тӱткышым ойырен. «Кодшо ийын 34 тыгай сооруженийым тӧрлымӧ да нӧлтымӧ. Тений ты сомыллан да эше вӱд объект-шамычым эрыкташ 9 млрд наре теҥгем палемдыме, тидыже кодшо ий деч ик млрд теҥгелан шукырак», – палемден тудо.
2026 ийысе шошо вӱдшорлан жапыштыже ямдылалташ тӱҥалме. Пытартыш 10 ийыште вӱдшор кокла показательже чот тале лийын огыл. Утларакше вӱд апрельыште талышна да кугу лӱдыкшым огеш лук.
Марий Элыште 189 гидротехнический сооружений (ГТС) уло. Вӱдшор жапыште диспетчер службо да мобильный группо-влак сутка мучко пашам ыштат, чыла ГТС-ыште эскерыше-влак дене телефон кыл уло. Март мучаш гыч сооружений-влакын ямде улмышт шотышто рейд тӱҥалеш.
2025 ийыште Медведево, Оршанке да У Торъял районлаште гидротехнический объект-влакым ачалыме. 2026-2027 ийлаште эше кокытым, Кужэҥер да Марий Турек районлаште, тӧрлатышаш улыт. Тидлан 104 млн утла теҥгем ойырат.
Вӱдшор шотышто ситуацийым Марий аварийно-утарыше службын личный составше терга, плавсредстве, технике да БПЛА полшат.
Пытартыш вич ийысе статистике почеш, пожар лӱдыкшӧ жап апрель кыдалне тӱҥалеш. Тенийысе тургымлан тӱҥ задаче-влак: илыме верлашке чодыра пожарым пурташ огыл, тыгак йӱлымӧ кумдыкым шагалемдаш.
Совещаний мучаште Дмитрий Патрушев палемден: мутым кучышо кажне ведомстве да элнасе чыла кундем вӱдшорын вияҥмыж шотышто тӱрлӧ планым ыштышаш.