22-25 сентябрьыште Хабаровск олаште Российысе самырык предприниматель-влаклан «Амур» форум эртаралтын. Тушко «Движение Первых» толкынын чолга участникше-влакат ушненыт. Марий Эл гыч форумышто Екатерина Речкина лийын.
Пионер
Катя Йошкар-Оласе 14-ше №-ан гимназийыште 9-ше классыште тунемеш. Шонкалымашан паша-влакым возкалаш йӧрата. Сочиненийже-шамычым тӱрлӧ конкурсыш колтеда.
– Школыштына 1955 ий годсек пионер дружине пашам ышта. 1994 ийыште тудо «Стелла» лӱмым пуымо. Пионер радамыш мый 2022 ий 19 майыште пуренам, тунам визымше классым тунем пытаренам ыле. Дружинын эртарыме ятыр акцийышкыже, поро пашашкыже кумылын ушнем. Адакшым пионер командынан тӱмырзыжӧ улам. Тылеч посна гимназийысе медиа-рӱдерын председательын пашажым шуктем, – палдарыш чолга ӱдыр.
Катя уста улмыжым тӱрлӧ конкурсышто пеҥгыдемда. 5-7-ше класслаште тунеммыж годым «Без срока давности» Всероссийский сочинений конкурсыш ушнен. 2022 ийыште эсогыл регионыштына икымше верым налын.
– Ӱмаште «Большая перемена» Российысе конкурсышто участвоватленам. Тӱрлӧ заданийым дистанционно сайын шуктенам да финалыш лекше моло участник-влак дене пырля «Артек» йоча рӱдерыште лийынам. Тушто шкемым сайын ончыктенам да кокымшо степенян лауреат лӱм дене мӧҥгӧ пӧртылынам. Вара «Движение Первых» толкынын конкурс отборжым эртенам да Анапыште верланыше «Смена» йоча рӱдерыш логалынам, – каласкала Е.Речкина.
Калининград марте шуын
Росмолодёжь «Молодёжь и дети» нацпроект кышкыраште «Больше, чем путешествие» проектым илышыш шыҥдара. Тудын почеш эн чолга ӱдыр-рвезе-влаклан Россий мучко яра путешествоватлаш йӧн пуалтеш. Ӱмаште Катя тиде проектлан кӧра Калининградыште лийын. Ола, тудын историйже, архитектуржо ӱдырын чоныштыжо келге кышам коденыт.
Журналист паша чонлан лишыл
Катя тений кеҥежым Пермьыште эртаралтше пашазе самырык тукымын XIII форумыштыжо лийын. Тудын мутшо почеш, вес олашке коштмаш, чолга еҥ-влак дене палыме лиймаш шинчымашым келгемдаш полшат, у кӱкшытыш шуаш кумылаҥдат. Сандене ӱдыр, ик форум деч вара, весыш каяш ямдылалтеш веле. Тидлан «Движение Первых» толкынышто улмо чот полша. Сентябрьыште Хабаровскыште лийше предприниматель-влаклан форум сай шарнымашым коден.
– Мый «Запускай на Амуре» направленийыште пашам ыштенам. Тушто эше 100 утла подростко лийын. Ныл кечыште «Созидание», «Человеческий фактор», «Мотивация» да «Дело чести» теме-влак дене моштымашнам саемдыме. Предприниматель-влак дене вашлийын, паша опытышт нерген палыме лийынна, мастер-класслаште участвоватленна, бизнес аланыште лекше нелылыкым сеҥаш корным кычалынна да шке проектым ямдылаш тунемынна. Эксперт-влак мемнам чын корно дене виктареныт. Маркетинг специалист Игорь Манн, журналист да «Москва-24» телеканалын шеф-редакторжо Андрей Воронин дене вашлиймаш келшен.
Ятыр конкурсышто мыйым СМИ дене кылдалтше направлений-влак сымыстарат. «Движение Первых» толкынын «МедиаПритяжение» проектышкыже ушненам. Тудын почеш конкурсын чыла этапшым эртенам да «Первый Кадр» направленийыште финалист лийынам. Тудо фотографлан да видеографлан келыштаралтын, – каласкала Екатерина.
Катя арам огыл медиалан шӱман. Тудын кочаже да ачаже Иван Никандрович ден Денис Речкинмыт палыме марий фотокорреспондент улыт. Ӱдыр шкежат ончыкшым журналист лийнеже. Кызыт тудо Телеграм каналыште шке блогшым вӱда. Тыгак гимназийысе пионер дружинын сообществын лаштыкшылан вуйын шога.
Е.Речкинан альбомжо гыч налме фото.