Ача ден кочаж гаяк писе да тале

Матародо школышто тунемше ӱдыр-рвезе-влаклан тиде рвезе дене кугешнаш гына кодеш.Кирилл Князев сайын тунемеш, историй да руш литератур дене олимпиадылашке коштеш, ончыл верым налеш. Тыгодым спортлан жапым ойырен мошта.  Куштылго атлетике, полиатлон дене заниматла.

Писын куржталмыж дене Кирилл ик гана веле огыл районышто икымше верым налын. Тиддеч посна кажне ийын физкультур дене олимпиадыште участвоватла, икмыняр гана сеҥышыш лектын.

Рвезылан писылык кочаж деч куснен, очыни, тудо талын куржталыштын улмаш. Ачажат Сергей Геннадьевич 60-100 метр кужытышто куржталаш тале лийын. А кызыт Кирилл нунын семын кроссышто шукыштым ончылта.

«5-ше классыште тунемем годсек кросслаште участвоватлем, районыштат, республикыштат таҥасенам. Ял йыр тренировко семын эре куржталыштам. Физкультур дене олимпиадышке эше 6-шо классыште кошташ тӱҥалынам. 9-ше классла марте эре 2-шо верышке лектынам. Кугурак класслашке вончымеке, ончыл верым налаш тӱҥалынам. Республике кӱкшытыштö участвоватлаш ӱжыт», – ойла рвезе.

Физкультур деч посна Кирилл историй да руш литератур дене олимпиадылашке коштеш, туштат тыгак ончыл верым налеш.

Кирилл школын чапшым шке семын веле огыл, тыгак команде дене арала. Кодшо ийын районышто баскетбол команде дене 2-шо верым налыныт.Школым тунемын пытарен, Озаҥысе але Чебоксарысе вузыш инженерлан тунемаш каяш шона.