Анастасиялан школышто руш йылме ден обществознаний урок-влак эн чот келшеныт. Ача-аважын темлымыж почеш 11-ше классыште Россий ФСИН-ын ведомственный вузышкыжо тунемаш пурен. Кызыт Анастасия Алексеева ФСИН-ын Марий Элысе управленийжын 1-ше №-ан следственный изоляторыштыжо пашам ышта, элгӧргӧ службо капитан.
Ӱдыр Йошкар-Олаште шочын-кушкын, тусо 26-шо №-ан гимназийыште тунемын. А вара Россий ФСИН-ын Самарысе юридический институтышкыжо тунемаш пурен.
– Ончыкылык профессий нерген шуко шонкален омыл. 11-ше классыш вончымекем, ачам ден авам уголовно-исполнительный системыште пашам ышташ темленыт, вет нуно шкештат тиде системыштак ыштеныт. Тыге Самара оласе институтын курсантше лияш ямдылалташ тӱҥалынам, – каласкала А.Алексеева. – Вич ий мӧҥгӧ деч тораште илымеке, шукылан тунемынам. Эн тӱҥжӧ – шкалан шке ӱшанаш да ответственный лияш. Вич ий пеш оҥайын да пайдалын эртен: занятий, построений, строевой подготовко, Сеҥымаш парад, художественный самодеятельность, шанче конференций-шамыч да молат.
Вуз деч вара Анастасия Марий Элыш пӧртылын. Распределений почеш 1-ше №-ан следственный изоляторыш режим да надзор пӧлкаште инспекторлан шогалтеныт. Тений гыч – наказанийым шуктымым тергыше группын инспекторжо.
– Службын икымше кечынжак изоляторышто шуко омса да тусо решётка-влак ӧрыктареныт. Тидлан тунем шуаш кӱлын. Уголовно-исполнительный системыште служитлаш куштылго огыл, тиде пеш ответственный паша, – манеш Анастасия. – Эн тӱҥжӧ, мыйын шонымаште, кеч-могай ситуацийыште чын айдеме кодаш.
Ӱдыр изиж годсек спортлан шӱман кушкын. Следственный изоляторыш служитлаш толмыж почеш тудым служебный биатлон дене таҥасымашке колтеныт. Спортын ты видыштыже Анастасия шкенжым икымше гана терген да управленийыште служитлыше ӱдырамаш-влак коклаште икымше верым налын. 2021 ийыште тудо республикысе управленийын сборныйжын еҥже семын Россий ФСИН-ын чемпионатыштыже вийжым терген. Самырык пашаеҥ мер илышышкат кумылын ушна. Анастасия – УФСИН-ысе ӱдырамаш-влак ушемын еҥже. 2020 ийыште тудо «Мисс УИС Марий Эл» конкурсышто кокымшо верым налын да «Мисс Артистичность» ден «Мисс Интернет-Симпатия» лӱм-влак дене палемдалтын.
Тений августышто Уфаште УИС-ын самырык специалистше-влакын «Лидер-2022» Российысе форумышт эртаралтын. Марий Эл гыч тушко Анастасия Алексеева миен.
– Уголовно-исполнительный системыште пашам ыштыше-влак коклаште тыгай форум икымше гана эртаралтын. Мероприятий нерген управленийын пашаеҥже-влак деч пален налынам да тушко ушнаш кумылем лектын, – ойла А.Алексеева. – Форум годым Россий ФСИН-ын вуйлатышыже-влак дене вашлийынна, самырык специалист-влакым тургыжландарыше йодыш-влак шотышто каҥашенна. Форум деч вара эшеат кумыл нӧлтын, ты системыште служитлыме шуын.
Службо деч яра жапыште Анастасия волейбол дене модаш коштеш. Йолташыже-влак дене вашлиеш, ача-аваж дене жапым эртара. Анастасиян эше ик йӧратыме аланже – флористике. Пеледышлан шӱман улмыжо ӱдыр дек аваж деч куснен. Садыштышт изиж годсек ӱдырлан пеледыш йыраҥ-влакым ӱшаненыт. Тудо флорист курсым эртен. Мотор букетым, композицийым ямдылаш да лишыл еҥ-влаклан пӧлеклаш тудлан – кугу куан.
А.Алексееван альбомжо гыч налме фото.