Лач тыге каласаш лиеш дыр школ омса гыч кумда илыш корнышко вончышо кажне выпускник нерген. Школ пӧрдем дене чеверласыше самырык айдеме тиде татым ӱмыреш шарнаш тӱҥалеш…
Морко район Шӱргыял школыш 9 ий ончыч поро койыш-шоктышан, шыма шинчаончалтышан ныл ньога шинчымаш тӱнян волгыдо «капкашкыже» вончаш толын. Индеш ий шижде эртен кайыш. Тачысе кечылан ик тунемше Владислав Николаев Морко посёлкышко тунемаш куснен, садлан кум тунемше гына 9-ше классым пытара. 21 майыште школыштына нунылан пытартыш йыҥгыр йоҥгыш.
Выпускник-влак школ йолгорныштым шарналтышт. Икымше туныктышышт А.Г.Михайловам мокталтен ойлышт. Уло чон шижмашыштым Анелия Георгиевналан пӧлеклалтше ой дене почыч. Но, чаманен каласыман, туныктышышт пайремыш толын кертын огыл. Туге гынат шке саламлымашан серышыже тунемшыже-влакын чонышто мондалтдыме кышам кодышо шарнымаш пӧлек семын лие.
Тыгак пайрем кечын школ директор А.Е.Алексеев шуко сай тыланымашым каласыш. Данил Егоровлан марий литератур дене районысо олимпиадыште призёр лиймыжлан чап кагазым кучыктыш. А мокталтен ойлымыж дене выпускникна-влакын изи чоныштым вӱчкыш. Кузе от мокто, вет Илья Коряков изиж годсекак Шӱргыял школнан чапшым районышто да республикыште спортышто арален шоген. Владимир Иванов – «Рвезе тукым» йоча ушемын эн виян барабанщикше. Кум тунемше илышын кум тӱрлӧ шӧрыныштыжӧ шуаралтын кушкын, туныктышо да йолташ-влак коклаште сай пагалымашым суленыт.
Ты кечын Шӱргыял школышто уна ятыр ыле. Морко районышто калыкым социально аралыме комплекс рӱдерын вуйлатышыже А.П.Семёнова да тудын алмаштышыже Л.Ю.Мамаева пеш шокшо кумылым ончыктышт. Тыгак выпускник-влак лӱмеш класс вуйлатыше Н.Г.Александрован тыланымашыже, ача-ава лӱм дене йоҥгышо шокшо мутын вий-куатше – чылажат пайрем кумылым ылыжтен вел колтыш.
Е.Григорьева, Шӱргыял школын марий йылмым туныктышыжо.
Снимкыште: Шӱргыял школын 9-ше классым пытарыше кум выпускникше.