Волжский район Шарача селаште шочын-кушшо Диана Алексеева тений И.С.Палантай лӱмеш тӱвыра да сымыктыш колледжыште «Сольное и хоровое народное пение» специальностьлан тунем лектын. Умбакыже МарГУ-што «Художественная культура» направлений дене шинчымашым налаш шона.
Школышто Диана спорт дене пеҥгыде кылым кучен: волейболла, баскетболла модын, таҥасымашлашке коштын. Тӱвыра алан дене илышыжым кылда манын шонен огыл. Тыгодым марий да руш йылмылам йӧратен тунемын.
– 11-ше классыште тунеммем годым авам (мурызо Надежда Васканова) Палантай лӱмеш тӱвыра да сымыктыш колледжыш тунемаш пураш темлен. Ачам художественный училищым тунем пытарен, авам – колледжын хоровой пӧлкажым. А мый тиде творческий шӱлыш дене шуаралт кушкынам, сандене авамын темлымекыже, тиде шонымаш дене келшышым. ЕГЭ деч посна ешартыш экзамен лийын, мемнам комиссий терген. Мый кок мурым муренам, тыгак музыкым шижын моштымым тергеныт. Тиде курсыш тунемаш пураш шонышо шуко еҥ лийын, тушеч куд еҥым гына ойырен налыныт. Чылаштым колыштмеке, комиссийын совещанийже лийын. Вара тунемаш пурышо-влакын фамилийыштым ойленыт. Нунын коклаште мыйынат лӱмем йоҥген. Тиде пиалан татым тачат сайын шарнем. Авам тӱвыра пашаеҥ гынат, икымше гана кугу сценыш колледжыште тунемме годым веле лекташ тӱҥалынам. Мемнам мураш, кушташ, тӱрлӧ семӱзгар дене шокташ туныктеныт, – манеш Диана.
Яра жапыште ӱдыр фортепиано кружокыш коштын. Тыгак балалайке дене шоктен. Кызыт гын мӧҥгыштӧ гына заниматла. Тунеммыж годым Д.Алексеева «Тулгайык» ансамбльын участницыже лийын. Тушто колледжысе ӱдыр-рвезе-влак мурен-куштеныт. Вуйлатышыже – Ольга Николаевна Данилова. Коллектив дене тӱрлӧ конкурслаште вийыштым тергеныт, ятыр кундемыш миен коштыныт.
– Моско олаште Гнесинмыт лӱмеш Российысе музык академийыште эртаралтше конкурс ушеш кодын. Тунам ме икымше вер дене палемдалтынна. А Ульяновск оласе мероприятийыште «Эн сай ансамбль» лӱмым суленна, да премийым кучыктеныт, – шарналтыш Диана. «Мурызо семын шкендым тергаш кумылет уке?» йодмемлан «Шонымаш уло, но эн ондак тидлан тунемаш кӱлеш» мане Диана. Кызыт ӱдыр кеҥеж пагытым ялыште, шочмо вершӧрыштыжӧ эртара. «Ешем, йолташем-влаклан шукырак жапым ойыраш тыршем. Нунын воктене чонемлан ласкан чучеш», – ойла Д.Алексеева.
Ача-аван мастарлыкышт, койыш-шок — тышышт йочалан вӱр дене кусна, маныт. Диана тӱвыра аланыште тыршаш шонен огыл гынат, ача-аван усталык шӱлышышт йочалан вончен. А умбакыже пӱрымаш ӱдырым ты аланыш конден. Тугеже тек Д.Алексеева умбакыжат ты аланыште чонлан келшыше паша верым муэш.
Фотом ӱдырын альбомжо гыч налме.