18-24 август – Алкоголь деч эрныме арня
Алкоголизм йӱшӧ еҥын веле огыл, тудын икшывыже-шамычынат илышыштым локтылшо чер. Ты проблеме нерген Республикысе наркологический диспансерын врач-психиатрже, психиатр-нарколог Александр Кизиченков радамла.
Алкоголь дене таҥлалт илыше еҥын йочаже тӱрлӧ нелылык дене тӱкна. Тыгай икшыве пала: ача-аважын койышышт кенеташте вашталт кертеш, тудо ача-аважын чон шокшыжым шижде кушкеш, иктаж проблемыже лектеш гын, нигӧлан эҥерташ. Чыла тиде йочан психикыштыже келге кышам кода. Тыгай ешыште кушшо йоча шкенжым эре титаканлан шотла, лӱдеш, ача-авалан мутым кучем манын шона. Садлан икшывын депрессий, тургыжланымаш, южгунам посттравматический стрессовый расстройство лийыт.
Адакшым ача-ава аракам йӱыт гын, йочалан мо кӱлешымат налаш окса ок сите, икшыве шот дене тунемын да шуаралтын огеш керт. Тыгай ешлаште чӱчкыдын кид дене шуыт, мут денат шӱрдылыт.
Садлан йочам аралаш – ик эн тӱҥ задаче. Алкоголизм зависимостян ача-ава-шамычлан квалификациян полышым пуыман:
– реабилитаций программе: алкоголизм деч утлымаште сай лектышыш шуаш полшышо тӱрлӧ программе;
– еш-влаклан полыш: йӱшӧ еҥлан да тудын ешыжлан алкоголизмлан кӧра лекше нелылык деч утлаш психологий полыш;
– профилактике: самырык да кугыеҥ-влаклан алкогольын эҥгекше нерген палдарымаш.
Икшыве-влакым воспитатлымаште алкоголь – моткоч кугу проблеме, туддеч утлаш тӱрлӧ йӧнлан эҥертыман. Йоча-влакым сай да таза условийыште куштымо ача-аван веле огыл, мемнанат ӱмбалне. Пырля тыршен веле ме йочам алкогольын зиянже деч арален да тудын пиалан ончыкылыкшым чоҥен кертына.
Те але лишыл еҥда ты проблеме дене тӱкненда гын, жапым шуйкалыде, специалист дек полышым йодын толза. Республикысе наркологический диспансерын адресше: Йошкар-Ола, Комсомольский урем, 81-ше №-ан пӧрт.
Марий Элысе Тазалык аралтыш министерствын архивше да freepik.com сайт гыч налме фото-влак.