Советский районысо Вечын селасе «Рвезе кумыл» калык вокал ансамбль коло ий утла ончыч шочын. Кызыт тудым Зинаида Александровна Гусева вуйлата.
Тудо ойла:
– Ансамбльым 1986 ийыште чумырымо. А 1989 ийыште калык лӱмым налынна. Ончыч фольклор ансамбль лийын. Марла муренна да куштенна. Кызыт куштышо коллектив уке. Ме лач мурена. Ансамбльыш шым ӱдырамаш коштына. Шукынжо кугурак ийготан улына. Но чоннаже эре рвезе.
Зинаида Александровна Советский посёлкысо музыкальный школын Вечын филиалыштыже калык семӱзгар классым вӱда. Йоча-влакым балалайке да домр дене шокташ туныкта.
– Ансамбльна мастарлыкым тӱрлӧ конкурсышто, марий пайремыште ончыкта. Тений шошым «Сеҥымаш тулсавыш» фестивальыште участвоватленна. Йошкар-Ола воктенысе Лапшансола ялын шочшыжо, партизанке Ольга Тихомирова нерген мурым муренна.
«Рвезе кумыл» коллектив утларакшым калык мурым йоҥгалтара. Участнице-влак костюмым шкеак ургат. Усталыкышт гоч шочмо йылмым моктат, марий калыкын муро поянлыкше дене палдарат.