Йошкар-Олаште илыше Дмитрий Бердинов окна ончылныжо ойыртемалтше
росота-влакым кушта. Кажне шошым пӧръеҥ помидорым але киярым огыл, а тӱрлӧ пушеҥге ден вондер нӧшмым ӱда.
– Пушеҥгым шындаш ачам кумылаҥден. Изи годым пакчаште олмапум шынденна ыле, – каласкала Дмитрий. – Тудын кушмыжым, саскам пуаш тӱҥалмыжым куанен эскеренам. Вара икмыняр пӱнчым шынденам. Иман пушеҥге-влакым кушташ чотрак йӧратем ыле. Тудо кеч кеҥежым, кеч телым эре ужарге. Лышташан пушеҥге-влак шыжым чиемыштым кудалтат да шошо марте чара шогат. Тиде мылам келшен огыл.
– Окна ончылно пушеҥге росотам кунам шындаш тӱҥалынат?
– Икымше росотам кандаш ий ончыч шынденам. Тидлан интернет гоч саскам вашке пуышо грецкий пӱкшым лӱмынак налынам. Кызыт тудо Марий Турек район Кырлян почиҥгаште шочмо сурт пеленем кушкеш. Пӱкшыжым але эше пуэн огыл, пеш вучем.
– Росота-влакым кузе куштет? Иктаж-могай секретет уло мо?
– Шуко кушкылын нӧшмыжлан стратификаций кӱлеш. Тидлан нуным тылзылан але утлараклан ночко ошмаш пыштем да холодильникыште кучем. Росота-влакым оласе пачерыште окна ончылно шинчыктем. Нуным эре эскерен шогыман, жапыштыже вӱдым шавыман. Тыгодым мландым утыждене вӱдыжтарыме дечат шекланыман. Шокшо юж да ночко мландылан кӧра тӱрлӧ чер вияҥын кертеш. Опытем шагал улмо годым тидлан кӧра шуко кедр росотам пытыш.
Росоталан мландым шкак ямдылем. Тидлан кевытыште налме универсальный грунтым, пилашӱкым, ошмам, перилит ден агроперилитым варем. Иман пушеҥге-влаклан агроперелит олмеш торфым ешарем.
– Нӧшмӧ-влакым кушто налат?
– Нӧшмым интернет полшымо дене оксала налам але иктаж-кӧ дене вашталтем. Соцсетьлаште пушеҥге ден моло кушкылым шындаш йӧратыше-влак шукын улыт. Ме кылым ваш кучена, кӱлеш нӧшмым муаш вашла полшена.
– Могай пушеҥге але вондер росотам шынден онченат? Нуным куш вераҥденат?
– Кызыт марте сибирский, корейский, стланик кедр-влакым, корейский нулгым, йошкар тумым, амурский бархатым, уссурийский грушым, бундукым, манчжурский, шем, «Зибольд» пӱкш-влакым, тӱрлӧ пӱнчым, фундукым, пӱкшермым шынденам. Ик ий ончыч рододендрон ден магнолий-влакым кушташ кумыл лекте. Садлан тений даурский ден ледебура рододендрон-влакым ӱденам. Тыгак йӱштӧ игечым чытыше «Кобус» ден «Зибольда» сорт магнолий-влакым шынденам. Тылеч посна «Джеффри» ден «Шверина» сорт пӱнчӧ-влакым ӱденам. Нунын имышт 15-20 см марте кушкыт. Пеш моторын койыт.
Ялыште оралтем воктене «Брабант», «Смарагд», «Глобоза», «Колумна» да моло сорт туя-влак кушкыт. Нуно эре ужарге шогат, моторын койыт, южым яндарештарат.
Пушеҥге росота-влакым шочмо ялем воктене, курык йымалне, яра
верыште, отышто, ял тӱҥалтышыште шындылынам. Кок ий ончыч виноградым шынденам ыле. Ӱмаште тудо икымше лектышым пуыш.
Ончен куштымо тӱрлӧ кушкыл Д.Бердиновлан куаным конда, нуным эскерен, чонжо кана.