Марий Турек район Аимке ялыште илыше Татьяна Смоленцеван кидпашаже-влакым Интернетыште ужын. Туддеке унала мийыде шым чыте – чылажымат шке шинча дене ужмо, кузе кидпашам шуктымыж нерген умылкалыме шуын.
У пӧртыштӧ
Татьяна Кужэҥер районышто шочшо Николайлан марлан лектын. Ик жап нуно Марий Турек посёлкышто пачерым айлен иленыт. Ик ий ончыч Аимке ялыште чоҥен шындыме пӧртышкышт илаш кусненыт.
«Пӧртым ятыр жап чоҥышна. Нылымше йочалан мӱшкыран улам ыле. Ик жап авамыт дене пырля илышна. Азам ыштыме пӧрт гыч вигак у пӧртыш илаш пурымо шуэш манынак, чыла сомылым писынрак ыштен шуаш тыршышна. Тыгак лие – илаш ӱмаште апрельыште пурышна», – каласыш Татьяна.
Смоленцевмыт ава капитал полшымо дене пӧртым чоҥаш тӱҥалыныт. Варажым 2015 ийыште нунылан самырык-влаклан кугыжаныш программе дене оксам пуэныт. Тыге кок пачашан пӧрт эркын-эркын куд ий утла нӧлталтын. Лишыл жапыште мончам чоҥен шукташ шонат.
Татьяна школ деч вара Оршанке педколледжыште ныл курсым тунемын, но чонжо туныктымо пашашке шупшын огылат, тунеммашым коден каен. Продавецлан тунем лектын. А вара марлан каен. Кызыт пелашыже Москошко пашам ышташ кудалыштеш, а Татьяна мӧҥгыштӧ йоча-влак дене шогылтеш. Тыгак Лев ден Варварам икшывыже-влакым школыш, Игнатым йочасадыш Марий Турек посёлко шумеш машина дене намиен кондыштара. Тыгодым изиракшым, Стефаниям, пеленже налеш.
Крючок дене келша
Кидпашалан Татьяна изиж годымак шӱмаҥын. Тидлан тудым аваже кумылаҥден. «Авам спице дене пидын. Эн ончыч носким ончен пидынам, вара тӱрлӧ узорым йодыштынам. Крючок дене пидаш утларак келша. Шӱртымат Интернетыште заказыватлем. Эн ончычак плюшевый-зефирный шӱртӧ толын. Пеш чот пушкыдо улмыжлан йӧратен шынденам да пледым пидынам», – ойла тудо.
Т.Смоленцева шукыж годым йочалан пушкыдо модыш-влакым ынде кок ий утла пидеш. Эн ончычак Интернетыште мастер-класслан тӱла да тусо тӱрлӧ конкурсышто участвоватла. Теве икана зебра модышым пидме дене кумшо верым налын.
Кодшо ийын У ий вашеш кидмастар гномик-шамычым пидеден. Соцсетьысе шке лаштыкыштыже нуным вераҥден, пашаже шукыштлан келшен. Тылеч вара икмынярын заказым ыштеныт.
Лунтик, мераҥ
«Кум ий ончыч йолташ ӱдыремын 1-ше классыште тунемше ӱдыржылан шочмо кечыжлан мераҥым пидынам ыле. Варажым Интернетыште оҥай мастер-классым ужмеке, тидлан оксам тӱленам. Мастар кидан ӱдыр-шамыч шкешт мастер-классым ыштат – тудым ончышо-влак 100 але 150 теҥгем тӱлен налыт. Южгунам онлайн йӧн дене мастер-класслашке ушнем. Мотор модышым ужамат, пидме шуэш. Ончыч авамлан, чӱчӱньылан кофтычкым, кугурак ӱдыремлан сарафаным упшым крючок дене пидеденам. Тыгак чыла йочамлан тӱрлӧ пагытыште да тӱрлӧ игече годым чияш ятыр упшым ямдыленам. Шукыж годым вес еҥлан куаным кондымыжо келша», – каласкала кидмастар.
Кызыт Татьянан опытшо погынен. Тудо ик пашам ик йӱдыштӧ тыманмеш пидын шукта. Тудын пӧртыштыжӧ кызыт коля, мераҥ, гномик-влак, маска, зебра, жираф, бегемот да моло янлык-влакат илат. Эн кугу мераҥже пылышыжге иктаж 60 сантиметрыш шуын. Тылеч посна роза пеледыш дене светильникым келыштара.
Татьянан мастар кидан улмыжым пален налмеке, ятыр еҥ тудлан заказым ышта. Тудо икмыняр йочасадыш театрализованный представленийлан упш-шамычым келыштарен пуэн.
«Такшым кид дене тӱрлыжым ямдылаш келша. Эн ончычшо воспитатель ден туныктышо-влаклан, авамлан пайрем вашеш гофрированный кагаз дене пеледыш аршаш-влакым ыштеденам. А икымше йочана Лёван йочасадыш коштмыж годым Лунтикым, тортым пӱчкыш-влакым пидынам ыле», — мане Т.Смоленцева.
Ныл йоча кокла гыч кидпалан утларакшым Варя шӱман. Тудо 3-шо классыште тунемеш да школысо «Творец» кружокыш коштеш. Тугеже ончыкыжым аважлан кидпашам ышташ полышкалыше уло.
Эльвира Терентьева.