Роспотребназорын Марий Элысе управленийышкыже кок пайремым эртараш йодмашым колтеныт.
Тидым Марий Элым вуйлатыше А.Евстифеевын кӱштымыж почеш ыштыме.
Иктыже 13 августышто – Я.Эшпай лӱмеш Марий кугыжаныш филармонийын у зданийжым почмаш, весыже 14 августышто – Йошкар-Олан кечыжым пайремлымаш.
Кызытсе эпидситуацийым шотыш налын, у филармонийыш 200 наре еҥым пурташ лиеш, уна-влакын спискыштым ончылгоч ыштыме. Ты пайремыш Российын тӱвыра министржымат ӱжмӧ.
Олан кечыжлан пӧлеклалтше концерт-влакым кава йымалне, почмо площадкыште ышташ шонат. Ончылгоч тыгай верлан Чарла кремльым ойырымо. Тушто 1700 наре еҥлан вер уло. Пайремым салют сӧрастарышаш.