Марий Эл нерген «Россия: 85 приключений» проектыште палдареныт. Пашан авторжо-влак Изи Какшан гоч шуйналтше кÿварым, эҥер воктен чоҥалтше мотор полат-влакым, Йошкар-Олаште улшо ойыртемалтше кок тÿрлö шагатым да молымат видео гоч моторын ончыктеныт.
Ты конкурс кок йыжыҥ дене эрташ тÿҥалеш. Ончыч Russia Beyond редакций Российысе 85 регионын ойыртемже дене палдарыше роликым сниматла да Интернет гоч ончыкта. Икмыняржым проектын сайтыштыже, Instagram да TikTok-ышто ужаш лиеш. Вара онлайн-йÿклымаш гоч ончышо-влак элнан 10 эн сай кундемжым ойыраш полшат. Мучашлан пашан авторжо-влак Россий нерген документальный фильмым ямдылат.
Мут толмашеш, Интернетысе соцкыллаште «#85приключений» челленджым эртарат. Тушко кеч-кöат ушнен кертеш. Шке кундемда нерген палдарыше кÿчык видеом (ойыртемалтше вер-шöрым, кочкышым да т.м.) сниматлен, #85приключений хэштег дене Instagram-ыште але TikTok-ышто 2022 ий 1 март йотке вераҥден шуктыман.
Видеом тыште ончаш лиеш.