Марий Элым вуйлатыше А.Евстифеев «Автодор М» ООО-н асфальтобетон заводышкыжо миен, паша дене палыме лийын, коллектив дене вашлийын.
Корным ачалыше ты компанийын лӱмжӧ Россий мучко палыме, Марий Элыште тудо 2021 ийыште почылтын. Предприятийын генеральный директоржо Олег Малов асфальтым лугымо установкым да корно шартышым тергыме лабораторийым ончыктен. Ты установко шагатыште 165 тонн асфальтым ыштен кертеш, у технологий-влакым кучылтыт, тӱрлӧ маркан асфальтобетон вартышым ыштат. Оборудо-
ванийым Российыште ыштыме, сандене пудырга гын, ачалаш шапаш ӱзгарым муаш неле огыл.
«Автодор М» компаний «Росдортехнологий» учреждений дене пырля пашам ышта. Кокымшыжо асфальтым шымла, ситыдымаш- влакым кычалеш, гарантийым пуа. Александр Евстифеев качествылан кугу тӱткышым ойыраш йодын: «У стандарт почеш асфальтобетонлан 6 ий гарантий лийшаш, но тынар ий эртымекат, тудо йӧршеш йӧрдымыш савырнышаш огыл. 2017 ийыште 98 процент корно нормативлан келшен огыл. Кызыт Марий Эл корным ачалыме дене Российыште – 13-шо верыште. Тиде позицийым йомдарышаш огынал». Тыгак регионым вуйлатыше заводысо коллективын паша условийже, соцпакет да пашадар нерген йодыштын. «Автодор М» компанийыште кокла шот дене 50-60 тӱжем теҥгем налыт», – вашештен О.Малов.