15 ноябрьыште республикысе Финанс министерствыште 2022-2023 тунемме ийлан Марий Элым Вуйлатышын стипендиатше-влаклан дипломым кучыктеныт.
Наградым Правительстве Председательын икымше алмаштышыже М.Васютин 59 самырык еҥлан торжественно кучыктен.
– Шукынжо ончыкылык профессий шотышто шке корныдам ойырен налында. Шонымыда шукталтше манын, Марий Элыште чыла йӧным ыштыме. Те производствышто тыршен але шымлымаш пашаште кугу кӱкшытыш шуын кертыда. Тидлан ятыр тыршыман да конкурент-влак деч чыла шотыштат кӱшнырак лийман. А те тидым ыштен сеҥеда, – ойлен М.Васютин.
Марий Элым Вуйлатышын стипендийжым профессиональный да кӱшыл шинчымашым пуышо организацийласе студент ден аспирант-шамычлан пуат. Кодшо тунемме ийыште нунын налме отметке-влак коклаште пелыж наре «отлично» лийшаш. Ӱдыр-рвезе-влак учебно-профессиональный аланыште да шымлыме пашаште, тыгак Российысе да тӱнямбал олимпиаде ден конкурслаште кӱкшытыш шушаш улыт.
Тений 59 стипендиат коклаште – профессиональный шинчымашым пуышо организацийын 28 студентше (кажне тылзын 1600 теҥге дене тӱлат), вузышто тунемше 22 ӱдыр-рвезе (2400 теҥге дене) да 9 аспирант (3000 теҥге дене).