Тений 18-20 сентябрьыште РФ Кугыжаныш Думыш сайлымаш лиеш. 2026 ийыште Марий Эл еҥ-влаклан дистанционно электрон йӱклымашке (ДЭГ) ушнаш пуыман регион-влк коклашке пурен. 3 август гыч кундемыштына тыге йӱклаш йодмашым налаш тӱҥалыныт.
ДЭГ дене Кугыжаныш Думыш, тыгак верысе сайлымашлаште пайдаланаш лиеш, нуныжо нине кечылаштак южо муниципалитетлаште лийыт. Тидлан «Госуслуги» порталыште пеҥгыдемдыме учётный запись лийшаш. Тыгодым йодмашым пуымо деч ончыч личный кабинетыште шке данный-влак чын улмым тергыман, палемдат республикысе Избирательный комиссийыште.
Онлайн йӱклаш манын, избирательлан теве мом ыштыман:
- 3 август гыч 14 сентябрь марте «Госуслуги» порталыш йодмашым пуыман да личный кабинетыште «Учтено ЦИК России» манын возымым вучен шуктыман;
- йӱклымаш кечылаште – 18 сентябрь 8 шагат эр гыч 20 сентябрь 20 шагат марте – vybory. gov.ru платформыш пурыман, «Госуслуги» портал гоч авторизироватлалтман, кӧ улмым СМС дене толшо код дене пеҥгыдемдыман, йӱклыман да «Ваш голос учтён» манын возымым вучен шуктыман.
ДЭГ йӧн дене смартфон але компьютер гоч йӱклаш лиеш, тидлан икмыняр минут гына кая. Тудын йӧнан улмыжым Марий Элым Вуйлатыше Юрий Зайцеват аклен. Тудо каласен:
– Интерфейс чот йӧнан, куштылгын йӱклаш лиеш. Мый, регионым Вуйлатыше семын, сайлымаш закон почеш, нимогай экшык деч посна эртыже манын шонем. Дистанционно электрон йӱклымаш лӱдыкшыдымӧ. Системе ӱшанлын аралалалтше, тендан олмеш але еҥ лӱм дене иктат йӱклен огеш керт. Шонем, тений тыгай йӧнлан эҥертем да дистанционно йӱклем.
Юрий Зайцев тыгак палемден: избирательный участкылаште кагаз бюллетень дене йӱклымашат аралалтеш. Кажне еҥ шканже келшыше йӧным ойырен кертеш.
Тылеч посна регистраций вер почеш огыл, а сайлымаш кечылаште кушто лийме вер почеш йӱклаш йодмашым налаш тӱҥалме. «Мобильный избиратель» механизм элыштына кеч-могай йӧнан сайлыме участкым ойыран налаш йӧным пуа, – ойлат Марий Элысе Избирательный комиссийыште. Тидлан кушто илыме верысе избиратель-влак спискыш пуртымо шотышто йодмашым пуыман, тыгодым ойырен налме участкым ончыктыман. Тидым икмыняр йӧн дене ышташ лиеш:
- «Госуслуги» портал гоч 14 сентябрь 24 шагат марте,
- 14 сентябрь марте кеч-могай турриториальный избирательный комиссийыш але Шуко функциян рӱдерыш шке миен,
- 9 гыч 14 сентябрь марте участковый избирательный участкыш миен.
Палемдыман, тыгай годым ик мандатан округ почеш йӱклымаш лиеш тунам гына, кунам кушто улмо верда ты округыш пура.