2 февральыште Марий Элым вуйлатыше Волжскысо электромеханический заводыш миен коштын да тудым почмылан 50 ий темме дене тусо пашаеҥ-влакым саламлен.
А.Евстифеев эн ончычак заводын тоштержым ончен савырнен. Заводын гендиректоржо Евгений Баутин предприятийын историйже дене палдарен, заводым вияҥдыме шотышто кугу надырым пыштыше вуйлатыше ден пашаеҥже-влак нерген каласкален, тӱрлӧ ийлаште ыштен лукмо аппаратур-влакым да у разработко-влакым ончыктен.
Тиде предприятий медициныште кучылталтше у оборудованийым лукташ тӱҥалын. Кызыт заводышто Волгатех дене пырля модульный роботизированный экзоскелетым ыштыме шотышто проект почеш паша шукталтеш. Кодшо ийын августышто тудын образецше «Армия-2020» военно-технический форумышто ончыкталтын.
Марий Элым вуйлатыше пашан ик приоритетшылан Волжск олам вияҥдымаш шотлалтеш манын. Пытартыш жапыште олаште сойциальный объект-влакым чоҥат да тӧрлатат. Теве 2019 ийыште (икымше гана 1991 ий деч вара) «Машиностроитель» микрорайонышто 320 веран у йочасадым чоҥымо; 2020 ийыште 5-ше №-ан школын 336 веран у корпусшо ышталтын; Волжскысо рӱдӧ городской эмлымверын йоча отделенийжым капитально олмыктымо. Тений Волжскышто у Аза пӧртым нӧлташ тӱҥалыт, контрактым ыштыме. Тудым кок ийыште ыштен шуктышаш улыт.
Тылеч посна Волжск олаште «Комфортная городская среда» федеральный проект почеш «Дубовая роща: парк городской культуры и экологии» проект почеш паша ышталтеш. «Родина» кинотеатрыште реконструкций лийшаш, тушто йоча сымыктыш школым вераҥдат. Тыгак очистной сооружений ден сеть-влакым вашталтыме теме пӱсын шога.
Варажым А.Евстифеев Волжскысо электромеханический заводын ойыртемалтше пашаеҥже-влаклан наградым кучыктен. «За заслуги перед Марий Эл» орденын медальжым гендиректор Е.Баутинын оҥышкыжо пижыктен. «Марий Эл Республикын сулло машиностроительже» лӱм дене производство шотышто гендиректорын алмаштышыже – производственно-диспетчерский отделым вуйлатыше А.Ометовым суапландарен. Тыгак икмыняр пашаеҥлан Марий Эл Республикысе Правительствын Почётан грамотыж ден Марий Элым вуйлатышын тауштымашыжым кучыктымо.
Эльвира ТЕРЕНТЬЕВА,