Йошкар-Олаште илыше 74 ияш пӧръеҥ модмыж годым экраныштыже ешартыш оксам ыштен налаш лийме нерген рекламым почын да операторлан возен колтен.
Икмыняр жап гыч тудлан ик мессенджерыш куратор возен колтен, мо-кузем умылтарен. Тыге кок арня жапыште илалше пӧръеҥ мошенник-влакын ойлымышт почеш ыштен да инвестиций счётышкыжо 5 млн наре теҥгем (погымо, кредит дене налме да палыме-шамыч деч арыме оксам) колтен.
Оксажым счёт гыч луктын кертын огылат, пӧръеҥ ондалалтмыж нерген умылен, палдара Марий Элысе МВД.