1-ше апрель гыч йочаштым икымше классыш тунемаш колташ шонышо ача-ава-влак деч заявленийым налме кампаний пашам ышташ туҥалын.
Медведево районысо туныктыш да самырык-влак дене пашам ыштыше пӧлка «Идём в школу!» чат-ботым почын. Тушто ончыклык школьник-влакын ача-ава-влакышт (закон почеш чын ача-ава-влак) тунемаш пурымо дене кылдалтше йодышлан вашмутым налын, йодмашым пуаш бланк-влакым муын кертыт. Тыгак чат-ботышто онлайн йодмашым возаш лиеш. Тыге вигак тунемаш пурымо ямде бланкым печатлен лукташ гына кодеш да моло кӱлешан документ дене пырля школыш наҥгаяш кодеш.
—
Чат-бот – (англ. chatbot) – тиде мутланаш ыштыме программе. Чат-бот тӱрлӧ сайтыште, мессенджерыште, мобильный приложенийлаште але телефонышто текст але аудио сообщений дене мутланаш йӧным ышташ полша.