Мыйын ачам могыр гыч кугезе кочам Алексей Федотович Глушков 1922 ийшыште Кужэҥер район Руш Шой ялсоветысе Шишкэҥер ялыште шочын. Ешаҥмекыже, Кужэҥер районысо Купсола ялыште илен.
Кугу Отечественный сарыш 1942 ий мартыште каен. Мӧҥгыштыжӧ Мария пелашыже кок изи йоча дене кодын. Кугурак шочшыжо Вера кум ияш, эргыже Йыван кандаш тылзе лийыныт. Самырык ӱдырамашлан сар жапыште икшывым ончен-кушташ, пашаш коштын шукташ, сурт-сомылым тӧрлаш неле лийын. Йоча-влакын изиш кушкын шумекышт, аван пашаже шагалемын. Изи Вера, Йыван шольыжым вӱдалтен, ял воктенсе кожлаш пум руаш коштын.
Жап шукат эртен огыл, 1942 ий 6 августышто Алексей Федотович ик кучедалмаште сусырген колен.
Ковамын ойлымыж гыч шарнем:«Ны колымо нерген кагаз, ны серыш толын огытыл. Ленинград областьысе мландыштак илышыже кӱрылтын. Сар деч вара авамлан ала-кӧ тудын колышо капшым ужмыжым ойлен улмаш. А ме ачанам тетла ужын огынал. Сарыш кайымыж деч ончыч авамлан мемнам кузе-гынат ончен кушташ кӱштен».
Кугезе кочамын изаже лийын – Василий Федотович Глушков. Тудат Белоруссийысе Могилевский областьысе Шаликово ял воктене 1942 ий 4 августышто колен.