Йошкар-Олаште шочын-кушшо марий ӱдыр Анастасия Иванова изиж годымак хореограф лияш шонен. Йоча годсо шонымашыже шукташ манын, ӱдыр кызыт И.С.Палантай лӱмеш тӱвыра да сымыктыш колледжыште хореографий творчество отделенийыште тунемеш.
Сымыктыш школ, колледж…
Настя Йошкар-Оласе 14-ше №-ан гимназийыште юнармий классыште шинчымашым поген. Тунеммыж годым школ илышыш чолган ушнен, тӱрлӧ мероприятийыште мастарлыкшым терген. Национальный президентский сымыктыш школышто шым ий шуаралтын да чыла «визытанлан» гына тунем лектын.
– Лач сымыктыш школышто туныктышем-влак мыйын моштымашем ужын-шижын шуктеныт да вияҥденыт. Тӱҥалтыште нелылыкат вашлиялтын, но, чыла тидым сеҥен лектын, мый виянрак лийынам. Молан лач хореограф лияш шонен пыштенам? Ончыкыжым куштымаш, тарванылмаш гоч моло-влаклан индивидуальностьым почын пуаш полшынем.
Кызыт Палантай лӱмеш тӱвыра да сымыктыш колледжыште кокымшо курсышто тунемам. Классический, бальный, калык куштымашым (нунын коклаште марийымат) тунемына, композиций да куштымашым шындымаш, ритмике, пластике дисциплине-влак улыт, – палдара студентке.
Настян чонжылан марий куштымаш утларак лишыл. Шке калыкын йӱлажым арален кодымаште куштымашынат рольжо кугу, манеш тудо. Колледжыште тунемме деч посна ӱдыр республикысе да российысе тӱрлӧ конкурсышто мастарлыкшым ончыкта. Утларакшым сольный номер дене лектеш, сеҥымашыжат ятыр. Икымше курсышто тунеммыж годым номер-влакым преподаватель-шамыч шынденыт гын, кызыт Анастасия шкенжым постановщик семынат терга.
Шке нерген палдараш йӧн
– Куштымо годым чонем кана. Движений гоч мый шке эмоцийым, кӧргӧ шижмашым: куанымат, ойгымат – почын пуэм. Сем почеш тарванылын, тургыжланымым мондем да пуйто йӧршеш юзо тӱняш кусаралтам, туштыжо сылнылык да гармоний озаланат, – ойла А.Иванова.
Сценыш Настя вич ияш гычак лекташ тӱҥалын гынат, кызытат калык ончылно выступатлыме годым тургыжлана. Тиде тыгакак лийшаш, манеш тудо, вет айдеме робот огыл.
Тунемме деч варат ӱдыр куштымо мастарлыкшым шуара. Шуко жапым тудо залыште эртара, «Марий памаш» ансамбльыш коштеш, ты коллективлан номер-влакымат ямдыла.
А.Иванован альбомжо гыч налме фото.