Майя Филиппова, уста фотограф:
– 2025 ийыште кумшо гана ава лийынам, ешыштына эше ик ӱдыр йоча шочын. Декрет отпускышто улам гынат, официально пашаш лектынам. Чыла сомыллан вуйын шогем, манаш лиеш.
Кугу куаным пӧлеклыше идалыкыште шуко нелылык дене тӱкнаш логалын. Но тидыже у кӱкшытыш шуаш, нӧлталташ йӧным ыштен. Вет эре сайын илыме дене серлагаш огеш лий, шонем. Тений родо-шамыч дене кыл утларак пеҥгыдеммым палемден кертам. Ме вашла йыҥгырташ, вашлияш тӱҥалынна. Чаманен каласыман, жап чӱдылан кӧра усталык пашамым изиш ӧрдыжкырак шӱкалаш логалын. Изи ньога дене съёмкыш лекташ йӧндымырак. Туге гынат кум выпускной класслан альбомым ямдылем.
2026 ий куштылгырак лиеш манын, уло чонем дене ӱшанем. Тудо пиалым, паша кумылым, икшыве-шамычым ончен кушташ вий-куатым, тӱням ужын кошташ йӧным ышта, шонем.