Лира Матвеева, МЭТР телеканалын журналистше:
– 2025 ий порын веле шарналт кодеш. Тудо шуко у событийлан поян лийын. Амира ӱдырна йочасадыште школлан ямдылалтме группыш вончен. Садлан яра жапна укеат, манаш лиеш. Тудо тӱрлӧ конкурсышто мастарлыкшым терга. Тений республикысе сылнымут конкурсышто икымше верым налын. Шкетан театрыште Марий тиште кечылан пӧлеклалтше пайремыште, Волжск оласе тӱвыра полатыште эртаралтше концертыште ачаж дене пырля кугу сценыште почеламутым лудын.
Мыйынат пашаште вашталтыш-влак лийыныт: В.Васильев лӱмеш йылмым, сылнымутым, историйым шымлыше институт дене проект пашам ыштена. Идалык тӱҥалтыште Российысе журналист ушемын эртарыме конкурсыштыжо сеҥымемлан саламленыт. Икманаш, паша да проект-влак дене «шолына».
Тыгодым еш нергенат огына мондо. Шыжым пелашем да ӱдырем дене Абхазийыште канышна. Тыге у пашалан вий-куатым пойдаренна. Тылеч посна йӧн лекме семын ешем дене каныш кечылаште Озаҥ, Шупашкар олалашке миен толаш тыршена.
У идалыкыш мый эртыше ийлан тауштен вончем. Чылаштым У ий дене саламлем да чонышто ласкалыкым, пашаште лектышым, ешыште пиалым тыланем!