«Вместе весело шагать»: #МУЗЫКАВМЕСТЕ проектын Студент-влакын тӱнямбал кечыштлан у сем пӧлекше
#МУЗЫКАВМЕСТЕ проект «Кугу Элын мурыжо-влак. Юл кундем гыч йӧратен» Студент-влакын тӱнямбал кечын икоян улмо да куанын ойыртемалтше сем символжо – «Вместе весело шагать» муро – йоҥга.
У аранжировкышто муро кызытсе ритм дене йоҥгалтеш: тале ударный, ксилофон да хорын мурымыжо студент-влаклан лишыл драйвым ешарат, тыгодым «йоча интонацийым» аралат. #МУЗЫКАВМЕСТЕ проектыште «Вместе весело шагать» клип Юл кундем федерал округышто музыкальный путешествийын нылымше пашаже лийын.
Клип Юл кундемын эн сӧрал верлаштыже войзалтын. Тидын шотыштак Марий Эл тораште кодын огыл. Видеороликыште Россий Федерацийын сулло да Марий Элын калык артистше Олег Кузьминых тӱмырым пералта. Тидын нерген тудо каласа:
– Тиде проект кӱлешан манын шонем. Меат, Марий Эл гыч артист-влак, тушто тыршенна. Шкенан марий койышнам, тӱвырнам, Йошкар-Оланам ончыктенна. Чыла сайынак койжо манын тыршенна. Ӱжмекышт, тӱҥалтыште мыйже кертам мо тыште шкемым ончыктем манын шоненам, Ӧрынамат ыле. Ондак студийыште йӱкым возенна. Вара июльышто Аргангельский слободаште видеом ыштыме. Шонем, чылажат сайын лектын.
Ты проектышке тыгак мемнан землякна – музыкант Даниил Ветлужских ушнен:
– #МУЗЫКАВМЕСТЕ проектыш ушнаш йӧн лекмылан тауштем! Тиде мыланем кугу усталык опыт лийын.
Тимур Ведерниковлан поснак кугу тау, тудын дене пашам ышташ пеш сай лийын! Тудын профессионализмже, чон шокшыжо да чынже денак кумылым нӧлтен моштымыжо пырля пашан кажне этапшым куштылемден.
«Вместе весело шогать» муро – чумыр тыршымашнан чын гимнже! Тудын волгыдо семже да келге мутшо икоян улмо да тӱшка пашалан ӱшаныме шӱлышым моткоч сайын ончыкта. Ынде, кунам тудым колам, шыргыжмым кучен ом керт – пуйто уэш тиде юзо кылым команде да музык дене шижам!
У видеоролик #МУЗЫКАВМЕСТЕ проектын лаштыклаштыже, тидын шотыштак ВКонтакте официальный тӱшкаште да полномочный представительын сайтыштыже pfo.gov.ru/ ужаш лиеш, тыгак трансляций регионысо телевизионный каналлаште эрта.
«Кугу Элын мурыжо-влак. Юл кундем гыч йӧратен» проектыш Юл кундем федерал округын моторлыкшым да поянлыкшым ончыктышо шым клип пура. «Течет река Волга», «Гляжу в озера синие» да «Как молоды мы были» клип-влакым #МУЗЫКАВМЕСТЕ площадкылаште ончаш лиеш.
Проект Тӱвыра инициативын президент фондын, ПФО-што Россий Федераций президентын полномочный представительын аппаратшын да «ДНК России» проектын полшымышт дене илышыш шыҥдаралтын.