Марий Элыште илыше пагалыме еҥ-влак!
Саламлем тендам Калык-влакын икоян улмо кече да Марий Эл Республикым ыштымылан 105 ий темме дене!
Нине пайрем-шамыч калыкнан икоян, ик историй пӱрымашан улмыжым, йӱлам пагалымыжым пеҥгыдемдат.
Калык-влакын икоян улмо кече элнан вий-куатшым, икте-весылан полшаш ямде улмым, кугезына-шамычын шуктымо подвигыштым шарныкта.
105 ий ончыч Российын составыштыже Марий республикым посна кугыжаныш семын ышташ пунчалме. Садлан Марий Эллан ты кече, чынжымак, кугу пайрем. Республикнан вияҥме да вашталтме корныжо икмыняр ийла дене эртен. Туге гынат регион шке ойыртемжым, поян тӱвыражым да йӱлажым, йылмыжым арален коден кертын.
Марий Эл – йол ӱмбалне пеҥгыдын шогышо да виян регион. Тыште Россий Президент Владимир Путинын темлыме национальный проект-влак илышыш шыҥдаралтыт. Калыкын илышыжым саемдаш манын, социальный объект-влак чоҥалтыт, медицине тӧнеж-шамыч, транспорт инфраструктур уэмдалтыт.
2025 ий – элыштына Элым аралышын идалыкше. Кугу Ачамланде сарыште сеҥымылан 80 ий теммым палемдена, совет калыкын мондалтдыме подвигшым шарналтена. Элнан кызыт могай ситуацийыште улмыжо поснак икоян лияш кӱшта. Кугезына-влакын лӱддымылыкыштлан да патырлыкыштлан вуйнам савена, спецоперацийыште Шочмо эл ончылно порысыштым шуктышо-влаклан полшена.
Тыланем тыланда пеҥгыде тазалыкым, пиалым, нимучашдыме вий-куатым да чыла сайым гына. Тек кажне суртышто тыныслык да келшымаш озаланат, тек ыштыме пашада куаным конда, а шӱм-чонда шочмо республик да элна верч кугешнымаш дене темеш.
Юрий ЗАЙЦЕВ, Марий Элым Вуйлатыше.