#МУЗЫКАВМЕСТЕ проект «Кугу Элын мурыжо-влак. Юл кундем гыч йӧратен» серий гыч у видеороликым представлятла. Ты гана ончышо-влакым Леонид Афанасьев ден Игорь Шаферанын кумдан палыме мурышт вуча – «Гляжу в озёра синие». Калык-влакын икоян улмо кечылан пӧлеклалтше видеороликын премьерже Юл кундем федерал округын эн сылне луклаштыже музыкальный путешествий лиеш.
Тиде мурым йоҥгалтарымашке Марий Эл гыч артист-влакат ушненыт. Марина Воронцова ден Иван Соловьёвын комментарийыштым лудаш темлена:
– Тимур Ведерников дене пырля пашам ыштыме эн сай шарнымашым коден. Тудын профессионализмже да тыгыде деталь-влакым тӱткын ончымыжо чынжымак кумылым нӧлтат. Усталык корнына Иван Соловьев дене студийыште вокальный дуэтым возымо гыч тӱҥалын да сылне набережныйыште клипым войзымо дене умбакыже шуйнен. Моткоч моторын лектеш манын вучена, –каласен Марина Воронцова. – Куандара: Российыште тыгай проект-влак илышыш шыҥдаралтыт, изи республикышкына уста еҥ-влак толыт. Тыгай инициативе-влак шукемыт манын ӱшанена.
– Шижалтеш: команде тӱрыснек пашашке вӱдылалтын да тудым чон пыштен шукта. Чылажат сай эмоцийым луктын: профессиональный йӧныштат, сылнын келыштарыме семыштат. Тиде – самырык тукымлан шыҥдараш кӱлшӧ сем произведений-влак. Йошкар-Олан тӱрлӧ тӱсан верлаштыже войзымо кок мурышко ушненна: йылме школ дене да Спасский башне воктене. «Гляжу в озёра синие» – Российым да тудын пӱртӱс моторлыкшым почын пуышо лирический композиций.
Проектышке мемнан землякна – музыкант Даниил Ветлужских ушнен:
– Тыгай инициативе-шамыч еҥ-влакым ушат. Тыгай кугу проектыш ушнаш йӧным пуымылан Тимур Ведерниковлан кугу таум каласынем. Нота-шамычым чыла шке шонен луктынна да импровизироватленна. Сниматлаш Козмодемьянскыш, Кава йымалсе тоштерыш, миенна. Тушто чынжымак пеш мотор сынан пӱртӱс. Профессионал-влакын командышт пеш писын войзеныт. Тыгай проект шукырак лийшаш манын шонем!
Проект Тӱвыра инициативын президент фондын, ПФО-што Россий Федераций президентын полномочный представительын аппаратшын да «ДНК России» проектын полшымышт дене илышыш шыҥдаралтын.
Видеоролик-влак #МУЗЫКАВМЕСТЕ проектын лаштыклаштыже, тидын шотыштак ВКонтакте официальный тӱшкаште да полномочный представительын сайтыштыже ужаш лиеш, тыгак трансляций регионысо телевизионный каналлаште эрта.
Ончыч, 29 октябрьыште, «Кугу Элын мурыжо-влак. Юл кундем гыч йӧратен» проект «Течет река Волга» муро гыч тӱҥалын.