29 октябрьыште #МУЗЫКАВМЕСТЕ «Кугу Элын мурыжо-влак. Юл кундем гыч йӧратен» кугу проект «Течёт река Волга» легендарный муро гыч тӱҥалын.
Проектын командыже пел ий жапыште мемнан округысо культур ДНК-м ончыкташ ПФО-н чыла 14 регионыштыжо лийын. Проектышке 400 утла артист ушнен, нунын коклаште – Марий Элын калык артистше Михаил Мосунов, кӱслезе-влакын «Чинчывий» ансамбльышт, Олык Ипай лӱмеш премийын лауреатше Светлана Яндукова.
Проектыш ушнышо артист-влак радамыште, ‒ Марий Элын калык артистше, музыкант Михаил МОСУНОВ:
‒ Мемнан локальный партий-влакым ончылгоч палемдыме огыл ыле, садлан импровизироватлаш, проектын авторжо-влакын темлыме аранжировко почеш тӱрлӧ семын мурен ончаш вереште. Мый Ольга Кормухина да Алексей Белов ден пырля пашам ышташ тӱҥалына манын шоненат омыл. Мылам тиде келша, молан манаш гын шкежат рок-музык дене заниматлем.
Светлана ЯНДУКОВА, Олык Ипай лӱме кугыжаныш премийын лауреатше:
‒ «Течёт река Волга» муро Юл кундемысе федерал округлан арам огыл ойырымо, вет ты эҥер мыланна пеш лишыл. Юл шке йырже шуко калыкым ушен. Мурын семже пеш виян. Мурыжат виян, куатле, тачысе жаплан келшен толшо. Ты муро чоныштына эн волгыдо кумылым шочыкта: тиде шке кугезе вожым, шке кугу элнам йӧратымаш. Садлан тудым Юл кундемысе федеральный округын гимнжыланат шотлаш лиеш.
Ты проект – калык-влакым иктыш ушышо ик эн виян да кӱлешан проект. Тудо мемнан элнан куатшым пеҥгыдемда да ончыкта: могай кугу талантан еҥ-влак илат Российыштына. Изи гыч тӱҥалын, ийготан марте шукын виян йӱкан улыт.
Проектыш ушнымаш мыланем вучыдымо ыле. Но Марий Элын калык артистше Михаил Мосунов дене когыньнан дуэтыште йӱкна пуйто иктыш ушна да моторын, виян шокта.
Марина ЗАВОЙСКИНА, «Чинчывий» кӱслезе-влак ансамбльым вуйлатыше:
– Ме нине муро-влакым ойырен нална: «Течёт река Волга», «Матушка Земля», «Гляжу в озера синие…».
Мыланна мурым возымо йӧн келшыш, Ведерников шкежак гитар дене шоктыш, а ме – кӱсле дене. Ужаш дене возышна, профессионал чыла вере профессионалак кодеш!
Пеш чапле проект. Тудо тӱрлӧ вел гыч мурызо-влакым иктыш уша. Марий кӱслем ончыктымаш – мыланна куан. Тыге вокалист-влак деч посна йӱлаш пурышо марий семӱзгар-шамыч денат палдарена. Муро пеш келшыш, тудо патриот кумылым шочыкта. Мый тиде мурым йоча годсек йӧратем, школыштак тунемынна да муренна. А кызыт тудым кӱсле почеш ончыктымаш – мыланна кугу чап.
Мурызо Ольга КОРМУХИНА:
– Тиде муро йӧратыме гына огыл, тудо илышыште ик эн тӱҥ муро манаш лиеш. Тиде мурым мый изинек палем да мурем. Тудым мыйын ача-авам, йолташем-влак муреныт. Тиде муро эн волгыдо чон шижмашым помыжалта, тыгак тудо моткоч патриотизм шӱлышан. А проект нерген ойлаш гын, тиде элым ушышо ик эн сай сем проект. Меат Алексей Белов дене моткоч куаненна да тушко ушнымыланна кугешнена. Проектын кужу да оҥай ончыклыкшо лиеш манын ӱшанена.
Чыла видеороликым #МУЗЫКАВМЕСТЕ проектын лаштыклаштыже да ВКонтакте официальный тӱшкаште ужаш лиеш.
Тыгак проект нерген «Марийская правда» газетын сайтыштыже лудаш темлена.
Проект Тӱвыра инициативын президент фондын, ПФО-што Россий Федераций президентын полномочный представительын аппаратшын да «ДНК России» проектын полшымышт дене илышыш шыҥдаралтын.