Тений 1 июльышто Марий Эл Радион икымше гана эфирыш лекмыжлан 20 ий теме. Тидын лӱмеш эртыше шуматкечын, 19 июльышто, Йошкар-Оласе «Марий Эл» Ий полатыште «Мыланна – 20 ий» концертыш элнан тӱрлӧ лукшо гыч кок тӱжемат пеле наре марий еҥ погынен.
Эр гычак радиовӱдышӧ-влак концертлан ямдылалтыныт: макияж, причёско, тувырым ямдылымаш, репетиций… Тений сценыште Володя Матвеев, Ирина Якаева, Сергей Карпов, Марина Почтенева, Мурызо Эчан, Виктория Мамаева, Рауль Гарифуллин, Алевтина Бокова, Жанна Фёдорова, Марина Глушкова, да у вӱдышӧ Дмитрий Веденькин лийыныт.
Нимогай марий пайрем муро да куштымаш деч посна ок эрте, садлан 15 шагат гыч Ий полат ончылно фольклор площадке пашам ыштен. Ончаш толшо-влакын кумылыштым «Кугезе кумыл», «Юлсем» да «Марий тӱр» ансамбль-влак нӧлтеныт да сылне мурым пӧлекленыт. Тыгак пайремыште волонтёр ден Ий полатын пашаеҥже-влак кугу пашам ыштен шогеныт. Уна-влакын лекше йодышыштлан лачак нуно чыла вашмутым пуэн кертыныт.
Марий Эл Редиом пайремышт дене саламлаш ятыр пагалыме еҥ вашкен. Марий Эл Правительстве председательын алмаштышыже, тӱвыра, печать да калык-влакын пашашт шотышто министр К.А.Иванов Марий Эл Вуйлатыше Ю.В.Зайцевын саламлымашыжым лудын пуэн да тыгак радион пайдале пашажым палемден.
Ий полатын сценыштыже 20 ий жапыште радион эфирыштыже йоҥгышо кумдан палыме муро-влакым шарналтеныт. Тора кундемла гыч толшо-влак лийыныт, южышт радио концертышке икымше гана ушненыт. Мурызо-влак Иван Смирнов, Роза Искакова ден Эльвира Токташева, Ирина Юшкина, Сания Рамай, Светлана Строганова, Александр Марков ден Сергей Пакеев, Эльвира Трифонова, Йорга Каче, Анатолий Ванин, Игорь Антропов, Надежда Крылова, Никита Козлов, Станислав Устюгов, Вадим Краснов, Эльвира Попова, Марина Воронцова, Татьяна Денисова, Иван Смирнов, Артём Ягодаров тыгак «Ошла сем», «Чинчывий», «Эрвел марий» ансамбль-влак, «Чоным почын мурена» проект да «У еҥ» группо, подтанцовкышто тыршыше куштышо коллектив-влак выступленийышт дене калыкын чонжым ылыжтеныт.
Программыште Шочмо эл верч шке илышыштым пуышо-влакым шарнымылан пӧлеклалтше тат-влак посна верым налыныт. Вӱдышӧ-влак специальный военный операций жапыште колышо герой-влакым шарналтеныт. Сценыш СВО-што Иван эргыжым йомдарыше Марий Элын сулло артисткыже Татьяна Яковлевна Денисовам ӱжыныт. Тиде жапыште уло зал кынел шогалын, мурызым колыштын. Мучашлан вӱдышӧ-влак, микрофоным кидыш налын, чыла артистым сценыш ӱжын, пырля муралтен, концертым мучашленыт.
А еҥ-влак «Мыланна — 20 ий» концерт нерген мом шонат?
Андрей Егоров, Морко район:
– Марий Эл Радион концертышкыже еш дене миенна. Мый тыгай марий шӱлышан кугу мероприятийыште икымше гана лийынам. Ий полатыш пурымо годым кугу черетыш логалаш огыл манын, ондакрак миенна, сандене ласкан пурен кертынна.
Концерт мыланна келшыш, тыгак палыме-влакымат ужаш перныш. Ачам студент годсо йолташыже-влак денат вашлие. Ий полатыште кылмена манын шоненам, туге гынат тыгай «шокшо» концертыште иктат кылмен ыш шукто.
Виктория Калугина, волонтёр:
– Мый икымше гана тыгай концертыште волонтёр лийынам. Тиде сомыл да концерт моткоч чот келшышт. Мыланем секторлаште пашам ышташ логалын, еҥ-влаклан билет почеш верыштым ончыктенам, южыштым ужатенак наҥгайыме, манаш лиеш. Тыгай мероприятийыште волонтёр лияш куштылгак огыл, молан манаш гын еҥ-шамыч дене пашам ыштыман, кажнын йодышлан вашмутым муын моштыман. Тыгай волонтёр пашаште моткоч кугу опытым налынам.
В.Поликарповын да еш альбомла гыч налме фото-влак.