ОҤАЙ ЛӰМ 
Ландыш
МарГУ-што тунемше Ландыш Габдулвалеева шке лӱмжӧ нерген тыге каласкала:
– Татарстан Республикысе Нуринер шочмо селаштем Ландыш лӱман вич ӱдыр улына, садлан тиде мыланем – тыглай лӱм. Тудым ачам пуэн. Лӱмем ландыш пеледыш дене кылдалтын. Татар йылмыште ландыш «эндже» манын йоҥга.
Такшым ешыштына кажне ӱдыр-ӱдырамашын лӱмжӧ пеледыш дене кылдалтыныт. Авамын да кугурак акамын лӱмышт «гуль» шомак гыч тӱҥалеш, ты мут татар йылме гыч пеледыш манын кусаралтеш. Шӱжарем – Сирина, ме тудым Сирень манына. Тӱрлӧ пеледыш дене кылдалтше шуко татар лӱм уло.
Тӱҥалтыш класслам туныктышем, мыйым ончен, сайын тунеммем шотыш налын да койыш-шоктышем шекланен, шке ӱдыржыланат тыгаяк лӱмым пуэн. Саде Ландыш мый дечем икмыняр пачаш чолга, моткоч ушан кушкеш.
Крымыш «Таврида» фестивальыш мийымем годым оҥай случай лийын. Ик волонтёр участник-влак спискыште лӱмем ужын да шке йолташыжлан каласен: «Ончал, Ландыш!» «Могай оҥай фамилий!» «Але тиде отчестве?» – йодын йолташыже. А мый воктенак шогенам тунам мӱшкырым кучен воштылынна.
Шке лӱмем Марий Элыш тунемаш толмекем гына йӧраташ тӱҥалынам. Мыланем шкем гаяк ныжылгын йоҥгышо лӱмым пуышт ыле манын, тылеч ончыч эре шоненам. «Могай мотор да ойыртемалтше лӱм!» шомакым чӱчкыдын колаш тӱҥалмекем веле шоналтенам: «Чынжымак, мотор лӱман улам!»