13 ноябрьыште УФСИН-ын специальный назначениян подразделенийжын пашаеҥже-влакын профессиональный кечышт лийын. Пайрем кечын Марий элысе «Ястреб» пӧлкажын «Почмо омса» акций эртаралтын. Тушко кажне кумылан еҥ миен кертын.
Марий Элыште УФСИН пелен спецназ отрядым ыштыме нерген 1992 ийыште приказым луктыныт. Икымше командир элгӧргӧ службын подполковникше Александр Ларин лийын. 1997 ийыште посна отрядлан «Ястреб» лӱмым пуэныт, а 1998 ийыште отряд олмеш пӧлкам почыныт. Тудым Дмитрий Александрович Загайнов вуйлата.
«Почмо омса» кечылан спецназ пӧлкан пашаеҥже-влак показательный выступленийым ямдыленыт: кудалше БМП (пехотын боевой машинаже) гыч шинчаш койдымын лектын возаш, «тушман» дене кредалаш кӱлын. Тыгак БМП машинам ончаш, тудын нерген шукырак пален налаш лийын. Школ гыч толшо йоча-влак уло кумылын машинаш шинчын онченыт, йодыштыныт. Тылеч посна автомат дене компьютер тирыш лӱйкаленыт, автомат ден пистолет магазиныш патроным погеныт, бронежилетым чиен онченыт, автоматым ронченыт да погеныт. А вара полевой кухньысо кочкышым тамлен ончаш йӧн лийын.
