«Без срока давности» научно-просветительский проект жапыште «телекӱвар» формат дене норвегийысе «Аркивет» тоштер комплекс дене Кугу Ачамланде сарыште Сеҥымашлан 80 ий темме лӱмеш мероприятийым эртарыме. Тудым Марий Элыште «Российын Курымашлык полкшо» общероссийский общественный гражданско-патриотический движений организоватлен.
Тушто нацист Германийын военнослужащийже-влакын граждан калыкын геноцидше да рушкалыкым пытарымашке ушнымышт, тыгак немыч концлагерьлаште улшо совет салтак-влакын подвигышт темым волгалтарыме. Ик тыгай герой – мемнан землякна, политрук лейтенант Петр Иосифович Боцманов. Тудо Норвегийыште «Аркивет» немыч концлагерьыште лийын. Тудын подпольный пашажлан кӧра ончыктымо концлагерьын ик пленный совет салтакат тушман могырыш вончен огыл, генерал А.Власовын руш освободительный армийышкыже доброволец семын пурен огыл. П.И.Боцмановым антифашист пашажлан кӧра 21.10.1944 гестапо тюрьмаште лӱен пуштыныт.
Мероприятийын темыжым Норвегийысе «Аркивет» тоштер комплексын пашаеҥже, Норвегийын гражданкыже Татьяна Торесен поддержатлен, тудо Норвегийыште увер деч посна йомшо совет салтак-влакын тойымо верыштым палемдаш полшен.
Йыргешке ӱстелын пашаштыже регионысо тунемше, студент да тунемме заведений-влакын педагогышт, боевой действийын ветеранышт, мер организаций-влакын активистышт, тыгак П.Боцмановын родо-тукымжо-влак участвоватленыт. Мероприятийын организаторжо-влак марий политрукын подвигше нерген Марий Элын сулло сӱретчыже А.Ю.Санниковын возымо сӱретше-влакым ончыктеныт, копийыштым Норвегийысе «Аркивет» тоштер комплексыш колтымо.